Техасын Хилл Каунти дэх үерийн улмаас амь эрсэдсэн хүмүүсийн тоо 81 хүрч, сураггүй алга болсон 40 гаруй хүнийг эрэн хайх ажиллагаа үргэлжилсээр байна. Үерийн голомт болох Керрвилл хотын дарга Далтон Райсын мэдээлснээр аврах ажиллагаа тасралгүй үргэлжилж буй ч хур бороо тасралтгүй орж байгаа тул аврах ажиллагаа эрсдэлтэй хэвээр байна.

Үерийн хамгийн хүнд цохилтод өртсөн газар бол олон арван жилийн турш хүүхдүүд хүлээн авдаг зуслан байрладаг бүс нутаг ажээ. Одоогоор зусланд амарч байсан 27 охин сураггүй хэвээр байгаа бөгөөд нас барагсдын дунд 15 хүүхэд байгаа нь гамшгийн хор хөнөөлийг улам нэмэгдүүлж байна.

Цаг уурын мэргэжилтнүүдийн мэдээлснээр пүрэв гарагийн оройноос эхэлсэн хэт хүчтэй агаарын урсгал, уур амьсгалын онцгой нөхцөл байдал Техасын төв хэсэгт нэг шөнийн дотор 6.8 их наяд литр хур тунадас буух нөхцөлийг бүрдүүлжээ. Гуадалупе мөрний ус хэдхэн цагийн дотор 2.1 метрээс 8.8 метр хүртэл нэмэгдсэн нь тухайн бүс нутгийн түүхэн дэх хамгийн гамшигт үерийн нэг болсон байна.

АНУ-ын Холбооны цаг уурын алба үерийн тухай сэрэмжлүүлгийг гурван цагийн өмнө өгсөн ч аврах ажиллагаа амжилтгүй үргэлжилж байгаа нь сэрэмжлүүлгийн системийн хоцрогдлыг харуулж байна гэж Дотоодын аюулгүй байдлын агентлагийн төлөөлөгч онцолжээ. Цагаан ордны зүгээс мэдээллийн системийг шинэчлэх ажлыг яаравчлуулж эхэлсэн байна.

Зарим бүс нутагт онц байдал зарлаж, орон нутгийн захиргаа, аврах албад, сайн дурынхан хүчээ нэгтгэн зуслангийн байшингууд, амрах төвүүд, хөрш айлуудыг нэг бүрчлэн шалгаж, амьд үлдсэн хүмүүсийг хайсаар байна. Аврах ажиллагаанд оролцож буй нисдэг тэргүүд шөнөжин нислэг үйлдсэн бол хурдан урсгалт усанд ажиллах чадвартай тусгай завьтай багууд иргэдийн мэдээлэл өгсөн газруудаар эрэн хайх ажиллагаа явуулж байна.

 

Одоогоор Керр Каунтид байдал хамгийн хүнд хэвээр байна. Аврах багуудын мэдээлснээр олон гэр бүл төөрч гэр оронгүй болсон, зарим хүмүүсийн цогцос хөрш зэргэлдээ хотуудад олдож байгаа ажээ.

Үерийн гамшигтай зэрэгцэн орон нутгийн олон байгууллага, сайн дурын бүлгүүд амь үрэгдэгсдийн ар гэр, орон гэргүй иргэдэд хоол хүнс, байр сууц, сэтгэлзүйн дэмжлэг үзүүлж эхэлсэн байна. Kerr County Flood Relief Fund, Salvation Army, World Central Kitchen зэрэг байгууллагууд мөнгөн хандив хүлээн авч, шуурхай тусламж үзүүлж байна.

Ням гарагийн оройноос дахиад бороо орж эхлэх төлөвтэй байгаа тул үерийн эрсдэл дахин үүсэх магадлал өндөр байгааг мэргэжилтнүүд анхааруулжээ.