БНХАУ-ын дарга Ши Жиньпин шинээр сонгогдсон АНУ-ын Ерөнхийлөгч Дональд Трамптай худалдааны маргааныг шийдвэрлэх чиглэлд хамтран ажиллахад бэлэн гэдгээ мэдэгдлээ. АНУ-Хятадын Бизнесийн зөвлөлд илгээсэн захидалдаа тэрбээр харилцан зөвшилцөл, хамтын ажиллагааг чухалчилж, Хятад улсын зах зээлийг Америкийн бизнесүүдэд улам нээлттэй болгох амлалт өгчээ. Мөн худалдааны дайнаас аль ч тал хожихгүйг анхааруулан, иймэрхүү зөрчил хоёр улсын эдийн засагт асар их хохирол учруулах эрсдэлтэйг онцолсон байна.

Хятадын тал худалдааны зөрчил хурцдах эрсдэлийг намжаахыг эрмэлзэж байгаа нь энэ мэдэгдлээс тодорхой харагдаж буйг шинжээчид дүгнэжээ. Гэвч хэдий Хятадын Засгийн газар хэлэлцээ хийх тал дээр эерэг байр суурьтай байгаа мэт харагдаж байгаа ч Трампын шаардлагыг шууд биелүүлэх магадлал бага талаар зарим шинжээч тэмдэглэж байна.

АНУ саяхан Хятадын эсрэг дэвшилтэт технологийн зарим бараандаа экспортын хязгаарлалт тогтоосон бол Хятад үүний хариуд газрын ховор элементийн экспортоо хориглох шийдвэр гаргаад буй. Энэ нь талуудын хоорондын харилцааг улам хурцатгасан ч худалдааны дайнаас зайлсхийх хэлэлцээрийн боломж бүрэн байгааг шинжээчид дурджээ.

Түүнчлэн Ши Жиньпин Трампын тангараг өргөх ёслолын үйл ажиллагаанд оролцох урилгыг хүлээн авсан нь түүхэнд анх удаа тохиолдож буй онцгой үйл явдал байв. Энэ нь хоёр орны хооронд эвлэрлийн шинэ эхлэл тавих боломжтойг илтгэж байгаа ч нөхцөл байдал хурцадвал Хятад улс АНУ-ыг зөвшилцөлд бэлэн бус улс мэтээр олон улсад харагдуулахыг зорих магадлалтай хэмээв.

Тэдний хооронд өрнөх цаашдын үйл явдал эдийн засгийн өрсөлдөөний төдийгүй геополитикийн хувьд дэлхий нийтэд чухал ач холбогдолтой юм.