Их Британийн газрын тос, эрчим хүчний салбарын томоохон тоглогчдын нэг “BP” компанийн дөрөвдүгээр улирлын орлого 48 хувиар буурч, 1.17 тэрбум ам.долларт хүрчээ. Үүнд цэвэршүүлэх үйлдвэрийн ашиг багасаж, зардал нэмэгдсэн нь голлон нөлөөлсөн байна. Тэгвэл үүнийг үл харгалзан “BP” 1.75 тэрбум ам.долларын хувьцаа эргүүлэн худалдан авах шийдвэр гаргаж, нэгж хувьцаанд 0.08 ам.долларын ногдол ашиг олгох шийдвэрээ хэвээр үлдээсэн байна.

Компанийн газрын тос, нүүрстөрөгчийн зарцуулалт багатай эрчим хүчний салбарын орлого 15 хувиар буурсан бол газрын тосны олборлолт 37 хувиар өссөн байна. Гэсэн хэдий ч нийт цэвэршүүлэх болон худалдааны салбарын үзүүлэлт сул гарчээ. Харин компанийн өр 23 тэрбум ам.долларт хүрч нэмэгдсэн бол хөрөнгө оруулалт 3.7 тэрбум ам.доллар болж буураад байна.

Тус компанийн гүйцэтгэх захирал Мюррей Очинклоус компанийн үр ашигтай ажиллагааг сайжруулж, мөнгөн урсгалаа нэмэгдүүлэхийн тулд стратегиа эрс шинэчлэхээр төлөвлөж буйгаа мэдэгдэв. Шинэ стратегийн хүрээнд “BP” 4,700 ажлын байрыг цомхотгож, зарим хөрөнгөө худалдахаар зэхэж байгаа бөгөөд 2026 он гэхэд 2 тэрбум ам.долларын зардал хэмнэх зорилт тавьжээ.

Сүүлийн нэг жилийн хугацаанд “BP” компанийн хувьцааны ханш 9 хувиар унасан бөгөөд шинэ стратегиа хоёрдугаар сарын 26-нд танилцуулах юм.