Tesla болон SpaceX компанийн гүйцэтгэх захирал Илон Маск АНУ-ын Ерөнхийлөгч Дональд Трампын дэмжсэн, татвар бууруулахын зэрэгцээ зардал танах зорилготой томоохон төсвийн хуулийг хүчтэй эсэргүүцэж “жигшүүрт балайрал” хэмээн нэрлэжээ.

“Уучлаарай, гэхдээ би үнэхээр тэвчиж чадахгүй нь. Энэ бол хэт их үрэлгэн, ашиг сонирхлын зөрчил дүүрэн, Конгрессын балайрал болсон хууль” хэмээн тэрбээр өөрийн X нийгмийн сүлжээнд нийтэлсэн байна. Тэрбээр уг хууль нь Холбооны төсвийн алдагдлыг хэтэрхий өсгөж, нийт алдагдлыг 2.5 их наяд ам.долларт хүргэнэ гэж анхааруулсан юм.

Маск нь өнгөрсөн оны сонгуулийн үеэр Трампын кампанит ажлын томоохон санхүүжүүлэгчдийн нэг байсан бөгөөд төрийн үрэлгэн зардлыг танах DOGE санаачилгын тэргүүнээр ажиллаж байсан. Тэрбээр саяхан CBS News-д өгсөн ярилцлагадаа ч уг хууль нь өөрийнх нь санаачилгыг үгүйсгэсэн үйлдэл боллоо хэмээн шүүмжилсэн.

Цагаан ордон түүний мэдэгдэлд хариу өгөхдөө, “Ерөнхийлөгч Илон Маскийн байр суурийг мэдэж байсан. Тэр хуулиасаа ухрахгүй” хэмээн хэвлэлийн төлөөлөгч Каролин Левитт мэдэгдлээ. Тэрбээр тус хууль төсвийн алдагдалд нэмэрлэхгүй гэж мэдэгдсэн ч Конгрессын Төсвийн Алба эсрэг байр суурь илэрхийлж, шинэ хуулийн үр дүнд ирэх 10 жилийн дотор 3.8 их наяд ам.долларын нэмэлт алдагдал үүснэ гэж дүгнэсэн байна. Цагаан ордон энэ тооцооллыг "Бүгд Найрамдахчуудын бодлогын эсрэг хандлагатай" гэж няцаасан юм. Ийнхүү төсвийн ирээдүйн нөлөө улс төр, эдийн засгийн хүрээнд маргаан дагуулах нь гарцаагүй болж байна.