Аялах хэдий сайхан ч аяллыг төлөвлөх нь тийм ч амар, таатай биш байдаг билээ.

“Expedia Group” компанийн судалгаанд дурдсанаар хүмүүс аяллаа захиалахаас 45 хоногийн өмнөөс эхлэн судалж, дунджаар 141 хуудас аяллын контент уншиж танилцдаг аж. Тэдгээрээс “Expedia”, “Travelocity”, “Orbitz”, “Priceline” зэрэг аялал жуулчлалын цахим агентлагийн мэдээлэл олны дунд түгээмэл бөгөөд аялагчдын 80 орчим хувь нь захиалга өгөх эсэхээс үл хамааран эдгээр цахим хуудасны аль нэгээр нь зочилсон байдаг тухай дээрх тайланд дурджээ.

Гэхдээ аль нь хамгийн боломжийн үнийг хэрэглэгчдэд санал болгодог вэ?

“RatePunk” компани нь аялал жуулчлалын зуу зуун агентлаг болон зочид буудлуудын цахим хуудасны мэдээллийг нэгтгэн, зочид буудлуудын үнийг өөр хооронд нь харьцуулах хайлтын өргөтгөлтэй аж. Тус компани 2023 оны нэгдүгээр сарын 1-нээс арванхоёрдугаар сарын 1-ний хооронд нийт 198,000 гаруй хэрэглэгчийн хайлтад үндэслэн аливаа зочид буудлын хамгийн хямд үнийг ямар цахим хуудас санал болгодгийг судалжээ.

Agoda: Ази, Ойрхи Дорнодын хамгийн хямд үнэ

Тус компанийн судалгаагаар дэлхийн хэмжээнд нийт хайлтын 34 хувьд “Agoda” хамгийн хямд үнийг санал болгосон бол “Priceline” 23 хувь, харин “Booking.com” 16 хувьд нь тааламжтай үнийг хэрэглэгчдэд санал болгосон аж.

Харин бүс нутгаар нь ангилбал, “RatePunk”-ийн мэдээллээр Ази, Ойрхи Дорнодод “Agoda” хамгийн хямд үнийг санал болгодог байна. Сингапурт төвтэй тус компани  Ази дахь зочид буудлын хайлтын бараг тал хувьд нь бусдаас бага үнийг санал болгожээ.

"Agoda маш боломжийн хямд үнийг санал болгодог" хэмээн “RatePunk”-ийн гүйцэтгэх захирал Жастин Альбертинас онцолж байна. "Хэрэглэгчдийн захиалгаас харахад тэд ихэвчлэн “Booking.com” эсвэл “Expedia” зэрэг хайлтын хамгийн том сайтуудаас хайж эхэлдэг ч эцэст нь “Agoda”-аар дамжуулан захиалга хийдэг" хэмээн тэрбээр нэмж тодрууллаа.

Энэхүү судалгаагаар “Agoda”-ийн үнэ бусдаас ойролцоогоор 10-15 хувиар бага, зарим тохиолдолд бүр 20 хувь хямд үнийг харилцагчдадаа санал болгож байна. Өндөр үнэтэй захиалгын хувьд энэхүү зөрүү их мөнгө хэмнэх ч, Азийн хаа нэгтээ 50 ам.доллараар нэг шөнө хонох зочид буудал захиалахад энэ нь төдийлөн ялгаатай үнэ болохгүй билээ.

Европт “Booking.com” хамгийн хямд үнийг санал болгодог

Европын хайлтын 38 хувьд “Agoda” хамгийн “сайн” үнийг харуулсан бол энэ тивд “Booking.com” нийт хайлтын 40 хувьд хямд үнийг санал болгожээ.

Түүнээс гадна Европ төдийгүй ерөөс бүхий л тив, бүс нутгийн зочид буудлуудад “Booking.com” цахим хуудасны мобайл буюу гар утас, таблетад зориулсан хувилбар нь суурин компьютероос хандахаас илүү хямд үнийг санал болгодог нь судалгаагаар харагдсан хэмээн Албертинас дурдсан байна. Суурин компьютерын систем нь шинэ хэрэглэгчийг өөртөө татахад өндөр зардал зарцуулдагтай холбоотой. Альбертинасын өгүүлснээр “Суурин компьютерийн хэрэглэгчдийг өөртөө татахын тулд цахим хуудсууд Google-ийн сурталчилгаанд төлбөр төлж, хайлтын системийн оптимизац хийх шаардлагатай байдаг” аж. Тиймдээ ч зарим зочид буудал гар утасны вэб хөтөч болон аппликэйшн хэрэглэгчдэд таатай үнэ санал болгох нь бий.

АНУ-ын захиалгуудыг “Priceline” тэргүүлж байна

Тэгвэл АНУ-г зорьж буй аялагчид түлхүү “Priceline” компанийн үнийн саналд тулгуурлан сонголтоо хийхийг зөвлөж байна. Судалгаагаар “Priceline” хамгийн хямд үнэ санал болгож буй нь батлагджээ. Санамсаргүй байдлаар сонгосон 40,000 хайлтын бараг тэн хагаст нь “Priceline” бусдаас хямд үнийг харуулсан байна.

Харин “Agoda” хамгийн бага хувийг эзэлсэн бөгөөд бусад бүс нутгийнх шиг тааламжтай хямд үнийг санал болгож, хэрэглэгчдийг өөртөө татаж чадаагүй аж.

Хэдийгээр судалгаагаар “Priceline” өндөр хувийг эзэлсэн ч 2024 онд АНУ руу зорчих аялагчид “Booking.com”-д түлхүү анхаарлаа хандуулахыг Албертинас зөвлөж байна. Америкт үйл ажиллагаагаа тэлэхийг эрмэлзэж буй “Booking Holdings” энэ онд олон төрлийн урамшуулал, хямдрал зарлах төлөвтэй аж.

“RatePunk”-ийн датад суурилсан судалгаагаар зарим вебсайт нь улс, бүс нутаг, хотоос хамааран харилцан адилгүй хямд үнийг харуулдаг байна. Тухайлбал, “Hotels.com” Мальдив болон Мексикт хамгийн хямд үнийг санал болгож буй. Түүнчлэн хэрвээ та дараах улс, хотод аялахаар зэхэж буй бол харгалзах цахим хуудсуудын үнийг хамгийн түрүүнд анзаарахыг зөвлөе.

Улс:

Booking.com - Итали

Agoda - Япон, Тайланд, Малайз, Австрали

Priceline - Франц

Expedia - Бразил

ZenHotels - Испани

Хот:

Booking.com - Нью-Йорк

Priceline - Майами, Лос Анжелес

Expedia - Гонолулу