Хүүхэд тэсвэр хатуужилтай, хүчирхэг нэгэн болж өсөх нь эцэг эхчүүдийн сэтгэл санааны тогтвортой байдал, эрүүл мэндтэй шууд холбоотой байдаг. Судалгаанаас үзэхэд өөрийгөө анхаарч, сэтгэл санаагаа тайван байлгаж чаддаг эцэг эхчүүд хүүхдэдээ илүү сайн нөлөө үзүүлдэг нь батлагджээ. Гэвч олон эцэг эх, ялангуяа ээжүүд, өөрсдийгөө золиослон бүхнийг хүүхдэдээ зориулахыг сайн эцэг эхийн шинж гэж үздэг. Харамсалтай нь, энэ хандлага эцэг эхчүүдийг стресстүүлж, туйлдахад хүргэж, улмаар хүүхдэд сөрөг нөлөө үзүүлэх магадлалтай аж.

Тэгвэл хүүхдэд хамгийн их хэрэгтэй зүйл бол сэтгэлзүйн хувьд тогтвортой, хүчирхэг асран хамгаалагч юм. Тиймээс эцэг эхчүүд өөрсдийн эрүүл мэнд, сэтгэл санаанд анхаарч, хүчирхэг байхын тулд дараах зарчмуудыг мөрдөх хэрэгтэй хэмээн судлаачид зөвлөж байна.

Таны сайн сайхан байдал хүүхдэд тань шууд нөлөөлнө

Хүүхдүүд эцэг эхийнхээ сэтгэл санааг маш сайн мэдэрдэг. Хэрэв эцэг эх нь бухимдалтай, эсвэл сэтгэл санааны хувьд тогтворгүй байвал хүүхэд үүнийг өөрийнх нь буруу мэтээр хүлээн авч, улмаар сэтгэл зүйн асуудалтай болох эрсдэлтэй. Тиймээс эцэг эхчүүд өдөр бүр өөрийнхөө сэтгэл санаагаа тольдож байх хэрэгтэй.

Эцэг эх байх нь бүх ачааллыг өөр дээрээ авна гэсэн үг биш. Харин өөртөө зориулж 15 минут ч болтугай амралт авч, сэтгэлээ тайвшруулах дуртай зүйлсээ хийх нь чухал. Жишээлбэл, ном унших, найзтайгаа ярих, халуун цай уух эсвэл халуун ваннд хэвтэх зэрэг жижиг боловч чухал алхмууд танд ихээхэн тус болно.

Хэрэв эдгээр арга ч таны сэтгэл санааг засахгүй байвал мэргэжлийн сэтгэлзүйчид хандахыг зөвлөж байна. Эцэг эхийн сэтгэлзүйн эрүүл мэнд нь гэр бүлийн хамгийн чухал тулгуур юм.

Хүүхэд өсгөх нь багийн ажил

Хүүхэд өсгөх бол ганцаараа хийх ажил биш, харин багийн ажиллагаа юм. Найз нөхөд, гэр бүл, эсвэл бусад эцэг эхчүүдээс дэмжлэг авах нь таны стрессийг бууруулж, хариуцлагыг хөнгөвчилж, сэтгэл санааны тогтвортой байдлыг нэмэгдүүлдэг. Долоо хоногт ердөө нэг цагийг бусадтай хамт өнгөрөөх нь стрессийг мэдэгдэхүйц бууруулж, эцэг эхийн үүрэг хариуцлагыг хөнгөвчилдөг.

Түүнчлэн хамтдаа ажлаа хуваалцан зохицуулах нь ажил амьдралын тэнцвэрийг хадгалахад тустай. Жишээлбэл, хүүхдээ сургуулиас авах, эсвэл спортын дугуйланд хүргэж өгөх ажлыг ээлжлэх, мөн хоолны хуваарь зохиох зэрэг нь цаг хугацаа хэмнэхээс гадна стрессийг бууруулдаг аж.

Эцэст нь дүгнэхэд, эцэг эх байх бол хүнд хэцүү атлаа хамгийн аз жаргалтай үүрэг. Эцэг эхчүүд өөрсдийгөө анхаарч, эрүүл байж чадвал хүүхэд нь аз жаргалтай, тогтвортой орчинд өсөх боломжтой. Энэ нь таны хүүхдийнхээ сайн сайхны төлөө хийж буй хамгийн чухал хөрөнгө оруулалт юм. Өөрийн эрүүл мэнд, сэтгэлзүйг хамгаалж, бусдаас тусламж хүсэх нь таныг илүү хүчирхэг асран хамгаалагч болгож, хүүхдэд тань бат бөх, аз жаргалтай амьдралын үндэс суурийг бий болгоно.