Өмнөд Солонгос, Хятад, Япон гурван улс 5 жилийн дараа анх удаа эдийн засгийн хэлэлцээ хийж, бүс нутгийн худалдааг хөнгөвчлөх арга замыг хэлэлцлээ. Энэ нь АНУ-ын Ерөнхийлөгч Дональд Трампын тарифын бодлогоос үүдэлтэй худалдааны дарамтыг даван туулах зорилготой юм. 

Гурван улсын худалдааны сайд нар Өмнөд Солонгос-Япон-Хятадын чөлөөт худалдааны хэлэлцээр байгуулах "бүс нутгийн болон дэлхийн худалдааг дэмжих" зорилгоор нягт хамтран ажиллахаар тохиролцсон гэж уулзалтын дараа гаргасан мэдэгдэлд дурджээ. 

Өмнөд Солонгосын Худалдааны сайд Ан Дүг Гүн хэлэхдээ:

"Гурван улс бүгд Олон улсын иж бүрэн эдийн засгийн түншлэлийн гэрээнд (RCEP) оролцдог тул түүний хэрэгжилтийг бэхжүүлэх шаардлагатай. Мөн Өмнөд Солонгос-Хятад-Японы FTA (чөлөөт худалдааны хэлэлцээр)-г урагшлуулж, худалдааны хамтын ажиллагааны шинэ тогтолцоо бүрдүүлэх ёстой" гэжээ. 

Гурван улсын хооронд 2012 оноос хойш гурван талт чөлөөт худалдааны гэрээний (FTA) талаар яриа хэлэлцээ хийж байгаа ч тодорхой ахиц гараагүй юм. 

Энэхүү түншлэл Монгол Улсад хэрхэн нөлөөлөх вэ?

Өмнөд Солонгос, Хятад, Япон гурван улсын эдийн засгийн хамтын ажиллагаа идэвхжиж, чөлөөт худалдааны хэлэлцээр (FTA) урагшлах нь Монгол Улсад шууд болон шууд бус хэд хэдэн байдлаар нөлөөлж болзошгүй байна. 

1. Худалдааны боломжууд нэмэгдэнэ

Монгол Улс эдгээр гурван улстай худалдааны нягт харилцаатай. Ялангуяа Хятад улс бол Монголын хамгийн том худалдааны түнш бөгөөд нийт экспортын 80 гаруй хувийг дангаараа бүрдүүлдэг. 

Хэрэв Өмнөд Солонгос-Япон-Хятад гурван улсын хооронд худалдааны саад багасвал, Монголын төмөрлөг, ноолуур, мах зэрэг бүтээгдэхүүнийг дамжин худалдаалах боломж нэмэгдэх магадлалтай юм.

2. АНУ-ын тариф ба Монголын эдийн засаг

АНУ-ын Ерөнхийлөгч Дональд Трамп автомашины импортод 25 хувийн тариф ногдуулсан нь Япон, Өмнөд Солонгос, Хятадын автомашин үйлдвэрлэгчдэд хүнд цохилт болоод буй.

Хэрэв эдгээр улс АНУ руу хийх экспорт нь буурвал, эдийн засгийн өсөлт нь саарч, Монголын эрдэс баялгийн эрэлт багасах эрсдэлтэй байна.

3. RCEP-ийн хүрээнд Монгол Улсын оролцоо

RCEP (Бүс нутгийн иж бүрэн эдийн засгийн түншлэл) нь Азийн 15 улсын хоорондын чөлөөт худалдааны хэлэлцээр боловч Монгол Улс одоогоор гишүүн биш юм.