Критикал минералын зах зээл дэх БНХАУ-ын ноёрхлыг хязгаарлах зорилгоор Австрали улс тус улсын хөрөнгийн биржид бүртгэлтэй, газрын ховор элементийн “Northern Minerals” компанид эзэмшиж буй хувьцаагаа худалдахыг БНХАУ-ын “Yuxiao Fund” болон түүний хамаарал бүхий компаниудад үүрэг болголоо.

Үндэсний эрх ашгийг хамгаалах зорилгоор энэхүү шийдвэрийг гаргаж буйгаа Австралийн Засгийн газраас мэдэгдсэн ба Сиднейн Хөрөнгийн биржид бүртгэлтэй эл компанийн хувьцаагаа худалдахыг “Yuxiao Fund” компаниас гадна түүний хамаарал бүхий “Ocean International Shipping and Service”, “Black Stone Resources”, мөн Хятадын иргэн Ши Ванг, Шимей Лиу нарт үүрэг болгожээ.

Австрали төдийгүй АНУ болон барууны зарим орон мөн эрчим хүчний шилжилтийн голлох түүхий эдүүд дэх Хятадын хөрөнгө оруулалтыг хязгаарлахыг эрмэлзэж байгаа ба критикал минералын үйлдвэрлэл, боловсруулалтад Хятад улс монополь тогтоогоод байгааг буруутгаж байгаа юм. “Yuxiao Fund” компани өнгөрсөн жил “Northern Minerals” дахь хувьцааны эзэмшлээ 19.9 хувьд хүргэхээр төлөвлөж байсныг Австралийн гадаадын хөрөнгө оруулалтын тухай хуулиар хүчингүй болгож байсан юм.

Сингапурт төвтэй “Yuxiao Fund” болон хамаарал бүхий компаниуд “Northern Minerals”-ийн нийт 7.55 хувийг эзэмшиж байгаа аж.