БНХАУ-ын эдийн засгийн удаашралыг үл харгалзан дэлхийн төмрийн хүдрийн хамгийн том  олборлогч “Rio Tinto” группийн эхний хагас жилийн ашиг өмнөх оноос өссөн үзүүлэлттэй гарлаа.

Хятадад үл хөдлөх хөрөнгийн хямрал үргэлжилж, цар тахлын дараах эдийн засгийн сэргэлт удаашралтай байгаа нь аж үйлдвэрийн салбарын ихэнх түүхий эдийн эрэлтийг бууруулаад буй. Хэдийгээр энэхүү үзүүлэлт түүхий эд олборлогчдод дарамт учруулж буй ч “Rio Tinto” компанийн зүгээс металл үйлдвэрлэлийн жилийн зорилтот хэмжээгээ өөрчлөөгүй юм.

Тус компанийн үндсэн ашиг энэ оны эхний хагаст 1.8 хувиар нэмэгдэж, 5.8 тэрбум долларт хүрсэн нь шинжээчдийн таамгаас ялимгүй доогуур үзүүлэлт аж.

Төмрийн хүдэр болон хөнгөнцагааны ханш буурсан нь тус компанийн орлого 200 сая ам.доллароор буурахад нөлөөлсөн ч энэхүү алдагдлыг зэсийн үнийн өсөлт нөхжээ.

Хятадын эдийн засгийн үзүүлэтүүд хэдийгээр түүхий эдийн зах зээлд сөргөөр нөлөөлж буй ч дэлхийн уул уурхайн томоохон олборлогчид ашигтай ажилласан хэвээр байна. 

“Бид хөнгөнцагааны бизнесээ алхам алхмаар өөрчилж, Пилбара дахь төмрийн хүдрийн үйл ажиллагаандаа тууштай үйлдвэрлэл явуулснаар өсөлтийн эргэлтийн цэг дээр ирж байна” хэмээн “Rio Tinto” группийн гүйцэтгэх захирал Якоб Стаусхолм мэдэгдэв.

“Оюу толгойн зэсийн далд уурхай мөнгөн урсгалыг мэдэгдэхүйц өсгөж байгаа бөгөөд Симандугийн хөрөнгө оруулалт болон Ринкон литийн төсөл хурдацтай үргэлжилж байгаа нь бидэнд илүү үнэ цэнийг авчрах болно” хэмээн тэрбээр нэмж дурджээ.

Тус компанийн орлогын тавны нэг орчмыг бүрдүүлдэг хөнгөнцагааны үйлдвэрлэл хагас жилийн хугацаанд өмнөх оныхоос 3 хувиар өссөн бол зэсийн үйлдвэрлэл 2 хувиар өсчээ.