Уоррен Баффетт бямба гарагт болсон Berkshire Hathaway компанийн хувьцаа эзэмшигчдийн уулзалтын үеэр АНУ-ын худалдааны бодлогыг шүүмжилж, худалдаанд хатуу хандлага баримтлах нь том алдаа гэж анхаарууллаа. Тэрбээр “Худалдаа бол зэвсэг биш. Дэлхийн бусад улс орнууд хөгжин дэвших тусам бидний хувьд илүү аюулгүй, илүү хөгжинө. Тэр үед та болон танай хүүхдүүд илүү тайван амгалан амьдрах болно” гэжээ.

Баффеттын үзэж буйгаар татвар, худалдааны хориг арга хэмжээ нь зарим тохиолдолд “дайсагнасан үйлдэл” болж сөрөг хандлагыг бий болгодог байна. “АНУ дэлхийтэй худалдаа хийх тал дээр илүү нээлттэй байх ёстой. Бид хамгийн сайн хийж чадах зүйлээ хийх хэрэгтэй, бусад орон ч мөн адил өөрсдийн давуу зүйлээ хийх хэрэгтэй” гэж тэр онцлов.

Энэхүү мэдэгдэл нь сүүлийн үед Цагаан ордноос хэрэгжүүлж буй импортын бараанд тавьсан түүхэнд байгаагүй өндөр татварын дараа Баффеттын хийсэн хамгийн ил тод байр суурь юм. АНУ Хятадын бараанд 145 хувийн тариф тогтоосны дараа, Хятад улс ч хариу болгож 125 хувийн тариф ногдуулсан. Харин өнгөрсөн долоо хоногт Бээжин АНУ-тай худалдааны хэлэлцээ эхлүүлэх боломжийг судалж байгаагаа мэдэгдээд буй юм.

Баффетт АНУ-ын хамгаалалтын шинжтэй бодлого нь урт хугацаанд сөрөг үр дагавартай байж болзошгүйг онцлоод “Дэлхий дээр 7.5 тэрбум хүн байхад 300 сая хүн л өөрсдийгөө онгирч магтаад байгаа нь ухаалаг биш, зөв ч биш. АНУ дэлхийн хамгийн чухал улс болсон, бид 250 жилийн өмнө бараг юу ч үгүй байсан гэдгээ санах ёстой” гэж хэлсэн юм.

Омаха хотын 94 настай “зөнч”-ийн эдийн засгийн төлөв байдлын талаарх байр суурийг хөрөнгө оруулагчид анхааралтай ажиглаж байсан бөгөөд түүний удирддаг Berkshire Hathaway-ийн даатгал, тээвэр, эрчим хүч, жижиглэн худалдаа зэрэг өргөн хүрээний бизнесүүд нь АНУ-ын эдийн засгийн төлөв байдлыг дүгнэх онцгой боломж олгодог юм. АНУ-ын эдийн засаг энэ оны эхний улиралд 2022 оноос хойш анх удаа агшсан үзүүлэлт гараад байгаа юм.

Berkshire Hathaway эхний улирлын орлогоо танилцуулахдаа татвар болон геополитикийн үйл явдлууд “тодорхой бус байдал” үүсгэж буйг онцлон, эдгээрийн үр нөлөөг одоогоор тооцоолох боломжгүй байгааг мэдэгдсэн байна.

Баффетт сүүлийн 10 улирал дараалан хувьцаа зарсан хэвээр байгаа бөгөөд 2024 онд нийт 134 тэрбум долларын хувьцааг борлуулжээ. Үүний дийлэнх нь Apple болон Bank of America дахь хөрөнгө оруулалт байжээ. Үүний үр дүнд Berkshire компанийн бэлэн мөнгөний хуримтлал гуравдугаар сарын байдлаар 347 тэрбум долларт хүрч, шинэ дээд амжилт тогтоосон байна.