АНУ-ын Ерөнхийлөгч Дональд Трамп NBC News агентлагт утсаар ярилцлага өгөх үеэрээ Украины дайны талаар хурц байр суурь илэрхийлж, Оросын түүхий нефтийг худалдан авч буй улсуудыг эдийн засгийн дарамтад оруулах бодолтой буйгаа илэрхийллээ. Тэрбээр хэрэв ОХУ Украины дайнтай холбоотойгоор эерэг алхам хийхгүй, цаашид дайныг улам сунжруулах хандлага гаргавал түүхий нефтийн гол хэрэглэгч орнуудад хоёрдогч тариф буюу 25–50 хувийн татвар ногдуулна гэв.

Трампын мэдэгдэл Хятад, Энэтхэг зэрэг Оросын нефтийн томоохон худалдан авагчдад чиглэж байгаа нь илт юм. Тухайлбал, Энэтхэг улс 2024 онд Оросын нефтийн хамгийн том худалдан авагч болсон бөгөөд нийт импортынх нь 35 хувийг тус улс бүрдүүлж буй. Хэрэв АНУ Трампын хэлснээр шахалт үзүүлж, Оросоос газрын тос авч байгаа орнуудад дарамт үзүүлж эхэлбэл дэлхийн зах зээлд доргилт үүсгэх магадлалтай байна. “Хэрвээ Оросыг буруутай гэж үзвэл, хэн ч Оросоос нефть худалдаж аваад АНУ-тай бизнес хийх боломжгүй болно” хэмээн Трамп мэдэгджээ.

Тэрбээр Украины Ерөнхийлөгч Володимир Зеленскийн хууль ёсны эсэх байр суурийг Владимир Путин үгүйсгэж, Украин дахь улс төрийн тогтолцоог дорд үзсэн нь өөрийг нь ихэд бухимдуулсан гэж хэлжээ. Мөн Путин өнгөрсөн баасан гарагт Украинд түр Засгийн газар байгуулж, дахин сонгууль явуулах санал гаргасныг Трамп огтхон ч хүлээн зөвшөөрөөгүй бөгөөд үүнийг “гал дээр тос нэмсэн” алхам хэмээн дүгнэжээ.

Энэ бүхэн нь Трампын АНУ-ын явцын сонгуулийн өмнөх байр сууриа улам тодруулах улстөрийн алхам гэж шинжээчид үзэж буй. Түүхий эдийн зах зээл ч түүний мэдэгдэлд мэдрэмтгий хандсан бөгөөд олон улсын худалдаа, геополитикийн харилцаанд ойрын өдрүүдэд тодорхойгүй хүлээлт бий болох нь дамжиггүй байна.