БНСУ-ын Үндсэн хуулийн цэц дөрөвдүгээр сарын 4-ний баасан гарагт 11:00 цагт Ерөнхийлөгч Юн Сок Ёлийг огцруулах эсэх асуудлаар эцсийн шийдвэрээ гаргах гэж байна. Тус шийдвэр нь 2023 оны арванхоёрдугаар сард Үндэсний Ассамблейн олонхын саналаар түүнийг үүрэгт ажлаас нь түдгэлзүүлснээс хойш өрнөсөн улс төрийн тогтворгүй байдлын хувь заяаг тодорхойлох чухал үе шат гэж ажиглагчид дүгнэж байна.

Өмнөд Солонгосын Ёнхап агентлагийн мэдээлснээр уг шийдвэрийг олон нийт нээлттэй сонсох боломжтой бөгөөд Сөүл хотын төвд байрлах Үндсэн хуулийн цэцийн барилгын гадаа олон хүн цуглах төлөвтэй байна.

Хэрэв Цэц огцруулах шийдвэрийг дэмжвэл 60 хоногийн дотор шинэ Ерөнхийлөгчийн сонгууль зохион байгуулах шаардлагатай болно. Харин эсрэг шийдвэр гарвал Юн Сок Ёль бүрэн эрхээ үргэлжлүүлэн хэрэгжүүлэх эрхтэй болох юм.

Сүүлийн долоо хоногуудад Сөүл хотод Юныг дэмжигч болон эсэргүүцэгч иргэдийн жагсаал ихээр ажиглагдаж байна. Зарим дүүрэгт том оврын трактор болон ачааны машин хүртэл дайчлан эсэргүүцлийн жагсаал хийжээ. Ерөнхийлөгч Юн Сок Ёль нь өнгөрсөн арванхоёрдугаар сард богино хугацаанд цэргийн онц байдал зарласнаас улбаалан Үндсэн хуулийн зөрчил үүссэн гэж сөрөг хүчин мэдэгдэж, түүнийг огцруулах үндэслэл болгосон юм.

Энэ нөхцөл байдалтай холбоотойгоор БНСУ, ялангуяа Сөүл хот руу зорчих иргэдийг олон нийтийн арга хэмжээнээс зайлсхийх, хувийн аюулгүй байдлаа хангахыг анхааруулж байна. Улс төрийн хурцадмал байдал, олон нийтийн жагсаал цуглаан нь гэнэтийн эрсдэл үүсгэх магадлалтай тул иргэд мэдээлэлтэй, болгоомжтой байх нь зүйтэй юм.