АНУ-ын Хууль зүйн яамнаас монополын эсрэг шалгалтын хүрээнд хиймэл оюуны чип үйлдвэрлэгч “Nvidia” компанид мэдүүлэг өгөх шаардлагыг мягмар гарагт хүргүүлээд буй. Уг мэдэгдэл гарснаар “Nvidia”-ийн хувьцааны ханш мягмар гарагийн арилжаагаар 10 хувиар буурч, тус компанийн зах зээлийн үнэлгээ 279 тэрбум ам.доллароор буурлаа.

Тус улсын Хууль зүйн яамны шалгалт албан ёсны гомдлын хэмжээнд хүрээгүй бөгөөд одоогоор “Nvidia”-ийн чип нь хэрэглэгчдийг бусад үйлдвэрлэгчид рүү шилжихэд хүндрэл учруулж байгаа эсэхийг шалгах шатандаа явж байгаа байна. Хиймэл оюуны хагас дамжуулагч чипийн зах зээлийн 80 гаруй хувийг “Nvidia” дангаараа эзэлж байгаа аж.

“Nvidia” анх үйл ажиллагаагаа эхлүүлж байхдаа өөрсдийн чипүүддээ зориулж CUDA хэмээх программчлалын хэлийг бүтээсэн бөгөөд ChatGPT зэрэг программуудад түлхүү ашиглагдаж байгаа юм. “Microsoft”, “Alphabet”, “Meta”, “Amazon”, “Tesla” зэрэг салбарын тэргүүлэгчид “Nvidia”-ийн чипийг ашигладаг байна.