Олон улсын анхаарлыг татаж буй ОХУ-ын Ерөнхийлөгч В.В.Путины манай улсад хийсэн албан ёсны айлчлал өндөрлөлөө. Тэрбээр хамгийн сүүлд Монгол Улсад 2019 онд айлчилж байсан бол таван жилийн дараа хийгдэж буй энэхүү айлчлалаар хоёр улсын хооронд хийсэн хэлцэл, айлчлалын хүрээнд шийдэгдсэн асуудлыг тоймлон хүргэе.

Манай улс шатахууны хэрэглээний 95 хувийг ОХУ-аас импортолдог. Тэгвэл энэхүү айлчлалын үр дүнд ОХУ-аас газрын тосны бүтээгдэхүүнийг саадгүй, тогтвортой нийлүүлэх боломж бүрдсэнийг Ерөнхийлөгчийн Тамгын газраас мэдээллээ. Мөн Улаанбаатар хотын дулааны хангамжийн 32 хувийг дангаараа нийлүүлдэг Дулааны гуравдугаар цахилгаан станцын өндөр даралтын хэсгийг 50 МВт-ын блок станцаар өргөтгөх, дунд даралтын хэсгийн 48 МВт-ын блок станцыг буулгаж суурин дээр нь 250 МВт-ын блок станц шинээр барих зураг төсөл боловсруулж, инженерийн судалгаа хийхээр талууд хэлэлцээрт гарын үсэг зурж баталгаажууллаа.