Ажиллаж эсвэл амьдрах зорилгоор гадаад руу нүүх эсэхээ шийдэхдээ анхаарах ёстой хамгийн том хүчин зүйлүүдийн нэг бол хувийн санхүү юм. Тэгвэл “InterNations” байгууллагын 2024 оны судалгаагаар экспатууд буюу гадаадын мэргэжилтнүүдийн хувьд амьжиргааны өртөг хамгийн багатай улсаар Вьетнам дөрөв дэх жилдээ дараалан тэргүүллээ. Ийнхүү Вьетнам улс 53 орноос нэгдүгээрт жагсаж, хувийн санхүүд хамгийн ээлтэй улсаар шалгараад буй.
174 орны 12,000 гаруй гадаадын мэргэжилтнүүдийн дунд явуулсан уг судалгаанд ажиллаж, амьдрахад хувийн санхүүд хамгийн ээлтэй болон ээлгүй хотыг онцолжээ.
Хувийн санхүүд хамгийн ээлтэй 10 улс:
- Вьетнам
- Колумб
- Индонез
- Панам
- Филиппин
- Энэтхэг
- Мексик
- Тайланд
- Бразил
- Хятад
Энэ жилийн жагсаалтад Азийн орнууд тэр дундаа Зүүн Өмнөд Азийн улсууд давамгайлан тэргүүлж, Вьетнам, Индонез, Филиппин зэрэг улс эхний 5 байрт жагссан байна. Үүний шалтгаан нь эдгээр улс орнуудад орон сууцны үнэ хямд байдагтай холбоотой аж.
Вьетнам улсад ажиллаж амьдарч буй экспатуудын 86 хувь нь амьжиргааны өртөгт эерэг үнэлгээ өгч, 65 хувь нь санхүүгийн байдалдаа сэтгэл хангалуун байгаагаа илэрхийлсэн. Мөн 68 хувь нь олж буй орлого нь тав тухтай амьдрахад хангалттай хүрэлцдэг хэмээн хариулжээ. Вьетнам дахь экспатууд илүү их орлого олох хандлагатай байдаг бөгөөд судалгаанд оролцогчдын 19 хувийнх нь жилийн орлого 150,000 ам.доллар ба түүнээс дээш байдаг нь дэлхийн дунджаас хоёр дахин их үзүүлэлт юм. Түүнчлэн Вьетнам улс ажлын байран дээрх соёл, сэтгэл ханамжаар өнгөрсөн жил 24-т эрэмбэлэгдсэн бол энэ онд 3-р байранд орж амжилтаа ахиулжээ. Экспатуудын хувьд дийлэнх нь ажил амьдралын тэнцвэрт байдлыг чухалчилдаг бөгөөд Вьетнамын экспатуудын ердөө 46 хувь нь бүтэн цагаар ажилладаг аж.
Үүнээс харахад гадаад улсын мэргэжилтнүүдэд Вьетнам улс стрессгүй амьдрал, өмнөх завгүй ажил амьдралын хуваариас нь эрс ялгаатай эерэг өөрчлөлтийг өгчээ. “InterNations Expat Insider”-ийн өргөн хүрээний судалгаагаар аз жаргал, амьдралын чанар, суурьшихад хялбар байдал, гадаадад хөдөлмөр эрхлэх төлөв байдал, зайлшгүй хэрэгцээт зүйлс зэрэгт үндэслэн улс орнуудын зэрэглэлийг тогтоодог байна. Энэ жил Индонез, Тайланд, Вьетнам, Филиппин зэрэг улсууд экспатуудын зорьдог шилдэг 10 орны тоонд багтжээ. 
