“Rio Tinto” ойрын таван жилийн хугацаанд жилд нэг сая тонн зэс үйлдвэрлэх зорилгодоо хүрэхийн тулд үйл ажиллагаа явуулж буй уурхай худалдан авахаас илүүтэй зэсийн шинэ уурхайг өөрсдөө хөгжүүлэхийг урьтал болгоно хэмээн тус компанийн Зэсийн группын захирал Б.Болд мэдэгдлээ.

Өдгөө тус компани жилд 700 мянган тонн зэс үйлдвэрлэж буй бөгөөд үйлдвэрлэлээ тэлэхдээ органик өсөлтийг голчлон анхаарч байгаа талаар тэрбээр Чилид энэ сарын 15-17-нд зохион байгуулагдсан CRU Дэлхийн зэсийн чуулганы үеэр онцолжээ.

Монгол Улсад хэрэгжиж буй Оюутолгой төслөөс гадна АНУ-ын Юта мужид байрлах Кеннекотт уурхайн олборлолтыг нэмэгдүүлэх, мөн Чилийн “Codelco” компанитай байгуулсан хамтын ажиллагааны хүрээнд хийгдэж буй геологи хайгуулын төслүүдээр дамжуулан үйлдвэрлэлээ нэмэгдүүлэхээр төлөвлөж байгаа аж.

Шинэ төслийг хөгжүүлэхэд шаардагдах хөрөнгө оруулалт, цаг хугацаа улам бүр нэмэгдэж буй ч уурхай бүтээн байгуулах нь үйл ажиллагаа явуулж буй уурхайг худалдан авахаас илүү үр ашигтай хэмээн “Rio Tinto”-гийн зүгээс үзэж байна. 2000 оны байдлаар зэсийн шинэ уурхайгаас нэг тонн зэс үйлдвэрлэхэд шаардагдах дундаж хөрөнгө 4000-5000 ам.доллар байсан бол 2012 онд энэ нь тонн тутамд 10,000 ам.доллар болж өссөн байна. Харин сүүлийн үеийн дүн шинжилгээгээр нэг тонн зэсийн үйлдвэрлэлийн зардал 44,000 ам.долларт хүрчээ.