АНУ-ын Ерөнхийлөгч Дональд Трамп мягмар гарагт Оросын эдийн засгийг "өмхийрсөн" хэмээн тодорхойлж, газрын тосны үнийн бууралт Орос-Украины дайныг зогсоох болно хэмээн дурдлаа. 

“Газрын тосны үнэ баррель тутамд дахин 10 ам.доллароор буурвал, Путин хүмүүсийг алахаа зогсооно. Түүнд өөр сонголт үлдэхгүй. Учир нь Оросын эдийн засаг үнэхээр муу байгаа” хэмээн Трамп CNBC-ийн “Squawk Box” нэвтрүүлэгт оролцох үеэрээ онцолсон юм.

ОХУ Украины эсрэг дайн эхлүүлснээс хойш гал зогсоох эсвэл энхийн хэлэлцээр хийхэд идэвхгүй хандсаар ирсэн нь олон улсын төдийгүй АНУ-ын тэвчээрийг бараад буй. Өнгөрсөн даваа гарагт Трамп Путинд тавьсан энхийн хэлэлцээр байгуулах хугацааг 50 хоногоос 14 хоног болгон богиносгож, эс бөгөөс ОХУ-ын худалдааны түншүүдэд өндөр тариф ногдуулахаа мэдэгдсэн.  

Үүний хариуд ОХУ-ын Ерөнхийлөгч асан Дмитрий Медведев “Трампын Оросын эсрэг тавьж буй шинэ шаардлагууд бол шууд заналхийлэл бөгөөд дайн өдөөх алхам” хэмээн X платформд бичжээ. 

ОХУ-ын хувьд Украины эсрэг дайны санхүүжилт газрын тосны орлогоос ихээхэн хамаарч байгаа юм. Барууны орнууд Оросын дайны санхүүжилтийг зогсоох үүднээс тус улсын газрын тосны экспортод хязгаарлалт тогтоосон ч Энэтхэг, Хятад зэрэг улс хямд үнэтэй Оросын газрын тосыг худалдан авсаар байна.

Энэхүү нөхцөл байдал нь Трампыг бухимдуулж, тэрбээр Энэтхэгийн бараа бүтээгдэхүүнд өндөр тариф ногдуулна хэмээн сүрдүүлж, Оросын газрын тосны худалдааг зогсоохыг шаардаж байна. Өнгөрсөн долоо хоногт тэрбээр Энэтхэгийн экспортод 25 хувийн гаалийн татвар ногдуулахын зэрэгцээ тодорхойгүй “шийтгэл” ногдуулна хэмээн анхааруулсан. 

Олон улсаас ирж буй дарамт, дотоодын инфляц, хүнс болон үйлдвэрлэлийн зардал өссөн нь ОХУ-ын эдийн засгийг хүнд байдалд оруулаад буй. Тус улсын эдийн засгийн өсөлт өнгөрсөн онд 4.3 хувь гарж байсан бол энэ онд 2.5 болж буурах төлөвтэй байна. 

Түүнчлэн энэ онд тус улсын газрын тос, байгалийн хийн орлого өмнөх таамгаас 24 хувиар буурах төлөвтэй байгаа аж.