Спорт, бооцоот таавар болон хонжворт тоглоомоос болж манай улсаас 500 сая ам.доллар хяналтгүй татваргүй гарч явсан гэж ЗГХЭГ-ын дарга Н.Учрал өмнө нь мэдэгдэж, хуулийн зохицуулалтыг чангатгана гэж мэдэгдсэн.

Тэгвэл энэ 7 хоногт нээлтээ хийсэн УИХ-аар Спорт, бооцоот таавар, хонжворт сугалааны тухай хуулийн төслийг хэлэлцүүлэхээр болжээ.

Боловсруулж дууссан төслөөр, хуулийн долоодугаар бүлгийн 20.1 дэх хэсэгт "Спорт, бооцоот таавар, хонжворт сугалааны ажиллагаа эрхлэгч нь спорт, бооцоот таавар, хонжворт сугалаанд оролцуулахгүй хүний жагсаалт хөтөлж болох бөгөөд хариуцлагатай тоглохыг дэмжих үүднээс оролцогч өөрөө, эсхүл түүний гэр бүлийн гишүүн хүсэлт гаргасан бол түүнийг спорт, бооцоот таавар, хонжворт сугалаанд оролцуулахгүй хүний жагсаалтад оруулна" гэж зааж өгсөн байна.

Хэрвээ гэр бүлийнх нь гишүүн бооцоот тоглоомд донтсон бол түүнийг тоглуулахгүй, оруулахгүй байх хүсэлтийг гэр бүлээс нь гаргаж, нэрийг нь жагсаалтад нь оруулж болно.  

Мөн 20.2 дахь хэсэгт "спорт бооцоот таавар, хонжворт сугалааны сөрөг үр дагавраас сэргийлэх зорилгоор оролцогчийн гэр бүлийн гишүүн оролцогчийг спорт бооцоот таавар, хонжворт сугалаанд донтсоны улмаас иргэний эрх зүйн чадамжийг хязгаарлуулах тухай хүсэлтийг шүүхэд гаргаж болно" гэжээ.

Нөхөр нь эхнэртээ мэдэгдэлгүй байраа зарж, мөнгөөр нь тоглосон хариуцлагагүй кейс олон бий. Иймд манай нөхөр хэдийгээр байрны ордер дээр нэр нь байдаг ч түүний зарах, бусдад шилжүүлэх эрхийг нь хязгаарлуулах зохицуулалтыг хуулийн төсөлд оруулжээ.

Байнгын хороогоор хэлэлцсэний дараа УИХ-д өргөн барьж, энэ хавартаа батлагдана гэсэн хүлээлт өндөр байна.

Одоогийн байдлаар спорт бооцоот таавар, хонжворт сугалааны үйл ажиллагаа  эрхэлж байсан домэйн хаягуудыг хааж, хяналтыг үргэлжлүүлж байна.