АНУ-ын технологийн аварга “Meta” компани Европын Холбооноос тавьсан шаардлагын дагуу тус бүс нутгийн хэрэглэгчдэд Facebook болон Instagram-ын зар сурталчилгаагүй хувилбарын үнийг 40 хувиар бууруулжээ.

Хэрэв тус бүс нутгийн хэрэглэгчид өгөгдөлд тулгуурласан зар сурталчилгааг харуулахыг зөвшөөрвөл тус компанийн зүгээс Facebook, Instagram-д үнэ төлбөргүй нэвтрэх боломжийг олгох аж.

Европын Холбооноос гаргасан зохицуулалтын дагуу “Meta” анх 2023 оны аравдугаар сард зар сурталчилгаагүй, төлбөртэй хувилбарын нэвтрүүлсэн юм. Тухайн үед мөн бүс нутгийн зохицуулагчид тус компанийг Европын Холбооны мэдээллийн нууцлалын хуулийг зөрчсөн гэх үндэслэлээр 400 сая ам.долларын торгууль ногдуулсан байна.

"Өнөөдөр бидний зарлаж буй өөрчлөлтүүд нь Европын Холбооны зохицуулагчдын шаардлагыг хангаж, Европын Холбооны хуульд зааснаас илүүг бид гүйцэлдүүлж байна" хэмээн “Meta” компанийн ерөнхийлөгч Ник Клегг мэдэгдлээ.

Тус компани Европын холбооны төлбөртэй хувилбарын сарын үнэлгээг компьютероос нэвтэрч буй хэрэглэгчдэд 9.99 еврогоос 5.99 евро, iOS болон Android үйлдлийн системтэй хэрэглэгчдэд 12.99 еврогоос 7.99 евро болгон бууруулна хэмээн онцоллоо.