Засгийн газар төрийн өмчийн менежментийг сайжруулах, үр ашгийг нэмэгдүүлэх зорилтын хүрээнд төрийн болон төрийн өмчийн оролцоотой компаниудын тоог 109-өөс 87 болгохоор төлөвлөж байна. Энэ хүрээнд төрийн өмчийг хувьчлах, олон нийтэд нээлттэй болгох бодлогын баримт бичгийг 2025 оны наймдугаар сарын 15-ны дотор боловсруулж танилцуулах үүргийг өгсөн байна. 

Хувьчлалын шинэ үе шат нь 2025-2028 онд хэрэгжих төлөвтэй байгаа бөгөөд энэ хугацаанд төрийн өмчит хуулийн этгээдийн хувьцааг хөрөнгийн биржээр арилжаалах, төрийн эзэмшлийн хувьцааг худалдах, өөрчлөн байгуулах үндсэн чиглэлүүд тодорхой болох аж.

Төрөөс өнгөрсөн 35 жилийн турш хэрэгжүүлсэн өмч хувьчлалын туршлага, алдаа оноог дүгнэж, холбогдох хууль, тогтоомжийг шинэчлэн найруулах шаардлагатайг холбогдох албаныхан онцолж байна. Тодруулбал, Үндсэн хуулийн агуулгад нийцүүлэн төрийн өмчийн төрөл, зүйлийг тодорхойлох, өмчийн удирдлагыг сайжруулах асуудал анхаарлын төвд байна. Үүний хүрээнд Төрийн болон орон нутгийн өмчийн тухай хуулийг шинэчлэн найруулж, компанийн тухай хуульд нэмэлт өөрчлөлт оруулахаар болжээ.

2025 оны эхний хагас жилийн байдлаар төрийн болон төрийн өмчийн оролцоотой 109 компанийн толгой, охин компаниуд эрчим хүч, зам тээвэр, уул уурхай, банк санхүү, харилцаа холбоо, хүнс, хөдөө аж ахуй, хөнгөн үйлдвэр, барилга, байгаль орчин, соёл, спорт, гадаад харилцаа зэрэг нийтдээ 11 салбарт үйл ажиллагаа явуулж байгаа юм. Эдгээрээс ашигтай ажиллаж буйг дэмжих, алдагдалтай компаниудыг татан буулгах, нэгтгэх, үргүй зардал, удирдлагын цалинг хянах бодлогыг хэрэгжүүлэхээр боллоо.