Монголын боловсрол, технологийн уялдаа ахисан шатанд гарч буйг харуулсан жишээ Улаанбаатар хот дахь Хүмүүн олон улсын сургууль болж байна. Тус сургууль хиймэл оюуныг хэрэглэгчийн түвшнээс давж, сурагчдын өдөр тутмын хөгжлийн орчинд цогц байдлаар уялдуулан нэвтрүүлж, улмаар сурагчдаар нь өөрсдөөр нь бүтээлч байдлаар хөгжүүлж буй цөөн байгууллагын нэг болоод байна.

Ингэхдээ сургуулийн сургалтын хөтөлбөрт хиймэл оюун заахыг цэцэрлэгийн наснаас эхлүүлсэн нь өвөрмөц онцлогтой болжээ. Бага боловсролын “Elf” хөтөлбөрийн хүрээнд тус сургууль Lifetree AI, Kids ChatGPT, AI Teacher Model зэрэг системүүдийг нэвтрүүлсэн бөгөөд эдгээр нь хүүхдүүдийн сэтгэл хөдлөлийг таних, удирдах, харилцааны чадварыг хөгжүүлэхэд дэмжлэг үзүүлж байна. Мөн хүүхдийн хөгжлийн үзүүлэлтүүдийг хиймэл оюунаар дамжуулан шинжлэх ухаанд суурилсан мэдээлэл болгон боловсруулж, эцэг эх, багш нарт хүргэдэг болжээ. Ойрын хугацаанд хүүхдийн хөдөлгөөнийг таних, зан байдал, байршлыг үнэлэх боломжтой шинэ системийг туршилтаар нэвтрүүлэхээр бэлдэж байгаа аж.

Харин дунд болон ахлах ангийн сурагчдын хувьд хиймэл оюуныг хэрэглээний түвшинд ашиглахаас илүүтэйгээр судалгаа, бүтээл, шинэлэг санааг хэрэгжүүлэх хэрэгсэл болгон ашиглаж байна. Тэд ChatGPT зэрэг ахисан платформыг зөвхөн хичээлийн туслах хэрэгсэл биш, харин судалгааны өгөгдөл боловсруулах, бүтээл туурвих, баримтжуулах зэрэгт үр дүнтэй хэрэглэх болжээ. Зарим сурагчид өөрийн зохион бүтээсэн хиймэл оюунт бүтээгдэхүүнийг хөгжүүлэн, хэрэглээнд нэвтрүүлж, орлого олох хүртэл хэмжээнд ажиллаж байгаа нь технологийн хэрэглэгч биш бүтээгч болж буйг харуулж байна гэж эцэг эхчүүд сайшаажээ.

Хүмүүн сургуулийн бас нэгэн шинэлэг хөтөлбөр бол Human Career Program буюу HCP юм. Энэ хөтөлбөрийн хүрээнд “AI career coach” нэртэй хиймэл оюунд суурилсан зөвлөх системийг хэрэглэж эхэлсэн нь онцлох өөрчлөлтүүдийн нэг. Уг систем нь сурагч бүрийн ирээдүйн мэргэжлийн чиг хандлага, шаардлагатай ур чадвар, элсэлтийн бэлтгэлийн төлөвлөгөөг тодорхойлж, бодит зөвлөгөө өгдөг. SAT, IELTS зэрэг шалгалтад бэлтгэх, элсэлтийн эсээг сайжруулах, хувь хүний хөгжлийн сургалт сонгох зэрэг өргөн хүрээг хамарсан үйлчилгээг энэ системээр дамжуулан авч болж байна.

Энэхүү AI career coach нь зөвхөн сурагчдад төдийгүй ангийн багш, эцэг эхэд ч тухайн сурагчийн хөгжлийн мэдээллийг уялдуулан хүргэж, хамтын ажиллагааны шинэ хэлбэрийг бий болгожээ. Түүнчлэн сурагчийн сонирхолд нийцсэн хичээлээс гадуурх төсөл, судалгаа, дадлагын хөтөлбөрүүдийг чиглүүлснээр хүүхэд бүрийн цогц хөгжлийг дэмжих бүтээлч орчныг бүрдүүлсэн байна.

Хүмүүн сургуулийн удирдлага “AI буюу хиймэл оюуны хөгжил бол бидний сурах, бүтээх, амьдрах хэв маягийг өөрчилж байна. Харин сурагчид маань энэ өөрчлөлтийг өөрсдийн гараар зөв удирдаж сурч байна” хэмээн онцлон тэмдэглэжээ.