Сошиал медиад эрүүл мэндийг дэмжих алхалтын төрөл бүрийн арга барилууд трэнд болоод байгаа ч хамгийн сүүлийн үед TikTok болон Instagram-д “Японы алхаа” хэмээх шинэ хандлага анхаарал татаж эхэллээ. Энэ дасгал нь ердийн 10,000 алхмын зорилгоос хэд дахин илүү үр дүнд хүргэдэг гэж зарим дасгалжуулагчид онцолж байна.
Энэхүү арга нь 2007 онд Японд хийсэн судалгаанд үндэслэгдсэн бөгөөд 246 хүнийг гурван бүлэгт хувааж туршжээ: ердийн амьдралын хэв маягтай бүлэг, дунд зэргийн эрчимтэй тогтмол алхдаг бүлэг (өдөрт 8,000 алхам ба түүнээс дээш, долоо хоногт дор хаяж 4 өдөр), болон өндөр эрчимтэй хосолсон алхалт хийдэг бүлэг.
Сүүлийн бүлгийн оролцогчид 3 минут удаан алхаж, дараа нь 3 минутын турш хүчтэй хурдтай алхах байдлаар 5 эсвэл түүнээс олон давталтаар, долоо хоногт 4 ба түүнээс дээш удаа дасгал хийжээ. Энэ бүлэгт хамаарсан хүмүүсийн тэсвэр тэвчээр, булчингийн хүч, цусны даралт зэрэгт илүү мэдэгдэхүйц сайжрал гарсан байна. Өнөө үед энэ дасгалыг “Японы алхаа” хэмээн нэрлэжээ.
2018 онд хийгдсэн өөр нэг судалгаанд энэ дасгалыг 10 жилийн турш дагасан оролцогчдын дунд хөлийн булчингийн хүч 20 хувиар, дээд зэргийн ачаалал даах чадвар 40 хувиар сайжирсан нь тогтоогдсон байна. Бүр дасгалыг бүрэн гүйцэд үргэлжлүүлж чадаагүй хүмүүс ч биеийн чадавхийнхээ тодорхой хэсгийг хадгалсан байв.
Эрчимтэй алхах үе шат бүрт зүрхний цохилт нэмэгдэж, бие илүү хүчтэй ачаалал авч байгаа тул дунд болон өндөр эрчимтэй долоо хоногийн дасгалын нормыг хангахад чухал нөлөөтэй ажээ. Судалгаануудын үр дүнгээс үзэхэд дунд болон өндөр эрчимтэй дасгал нь зүрх, уушгины ажиллагааг сайжруулж, эрт нас баралтын эрсдлийг бууруулдаг гэнэ.
Энэхүү дасгалыг хийхдээ, өндөр эрчимтэй алхалтын үеэр зүрхний цохилт нэмэгдэж, бага зэрэг амьсгаа давчдах мэдрэмж төрөх хэрэгтэй. Энэ нь таны хүчин чадлын 70 орчим хувьтай тэнцэнэ. Харин удаан алхах үе шат нь амар тайван байх бөгөөд ярихад саад болохгүй байх түвшинд байна.
Дасгалыг хийхдээ 3 минут хурдтай, 3 минут зөөлөн алхаж ээлжлэн, нийт 30 минут үргэлжлүүлнэ. Үүнийг долоо хоногт дөрвөн удаа хийх нь хамгийн үр дүнтэй гэж судлаачид зөвлөж байна.