Бүгд Найрамдах Солонгос Улсын Ерөнхийлөгч асан Мүн Жэ Ин-ийг авлигын хэрэгт холбогдуулан албан ёсоор ялласан талаар Жонжү дүүргийн прокурорын газар энэ пүрэв гарагт мэдээлэв. Энэхүү хэрэг нь түүний хүргэн Тайландын нэгэн компанид өндөр албан тушаалд томилогдсонтой холбоотой юм.

Прокурорын газрын мэдэгдэлд дурдсанаар хууль тогтоогч асан Ли Сан Жик нь 2018-2020 оны хооронд Тайланд улсад төвтэй, өөрийн хяналтанд байдаг компанид Мүн ерөнхийлөгчийн хүргэнийг гүйцэтгэх захирлаар ажиллуулж байжээ. Түүнд энэ хугацаанд цалин болон амьдрах зардал хэлбэрээр нийт 5.95 сая тайланд бат буюу 177,506 ам.долларын хөлсөөр ажиллуулсан нь тухайн үеийн төрийн тэргүүнд өгсөн хахууль гэж прокурорууд үзсэн байна. Үүнийхээ хариуд Ли-г Жижиг, дунд үйлдвэр, гарааны бизнесийн агентлагийн тэргүүнээр томилуулах замаар ашиг сонирхлын зөрчилтэй гэрээ байгуулсан байх магадлалтай гэж үзэж байгаа юм.

Хэргийг мөрдөн шалгаж буй байгууллагаас Мүн Жэ Ин болон Ли Сан Жик болон тэдний өмгөөлөгчдөд хандан мэдэгдэл өгөх хүсэлт хүргүүлсэн ч ямар нэг тайлбар хийгээгүй байна.

Мүн Жэ Ин нь 2017-2022 оны хооронд БНСУ-ын төрийн тэргүүнээр ажилласан бөгөөд хүний эрх, ардчиллыг дэмжигч либерал үзэл баримтлалтай улс төрч гэдгээрээ танигдсан. Хуульч мэргэжилтэй тэрбээр улс төрд орохоосоо өмнө иргэний нийгмийн идэвхтнээр олон жил ажилласан түүхтэй.

Түүнийг Ерөнхийлөгчийн бүрэн эрхийн хугацаагаа дуусгасны дараа 2022 онд прокурор асан Юн Сүг Ёль түүний халааг авсан юм. Харин Юн Сүг Ёль энэ сард ардчиллын зарчимтай харшлах хэлбэрээр цэргийн хуулийг түр хугацаанд хэрэгжүүлснээр улс төрийн дарамтад орж үүрэгт ажлаасаа огцроод байгаа юм. БНСУ-д төрийн өндөр албан тушаалтнуудын хариуцлага, ёс зүйн асуудал олон нийтийн анхаарлын төвд байдаг бөгөөд өмнөх ерөнхийлөгч нар ч авлигын хэрэгт нэр холбогдож байсан удаатай юм.