Америкийн Зүрхний Холбооны “Stroke” сэтгүүлд хэвлэгдсэн нэгэн шинэ судалгаагаар 50-аас доош насны залуучуудын дунд шалтгаан нь тодорхойгүй гэнэтийн буюу “нууцлаг” тархины цус харвалт нэмэгдэж буйг тогтоожээ. Эдгээр тохиолдлуудын ард уламжлалт бус эрсдэлтэй хүчин зүйлс, тэр дундаа зүрхний дээд хөндийн хоорондох нээлттэй бүтэцтэй буюу зүрхний цоорхойтой холбоотой байж болзошгүй гэж дүгнэсэн байна.

Зүрхний цоорхойтой өвчтөнүүдийн дунд цус харвалт үүсгэгч нь архаг бөөрний өвчин, хорт хавдар эсвэл венийн судсаар цусны бүлэн үүсэх зэрэг уламжлалт бус хүчин зүйл байжээ. Харин цоорхойгүй хүмүүсийн дунд эдгээр хүчин зүйл харьцангуй бага ажиглагдсан байна.

Судалгааны бас нэг анхаарал татсан дүгнэлт бол толгой байнга таллаж өвддөг мигрень буюу мэдрэхүйн өөрчлөлт дагалддаг толгойны өвдөлт юм. Ялангуяа эмэгтэйчүүдийн дунд мигрень нь нууцлаг харвалтын хамгийн гол эрсдэлт хүчин зүйл болжээ. Өвчтөн бүрэн сэрүүн байхад гэнэтийн гэрэл гялбах, дүрс харагдах зэрэг мэдрэмж дагалддаг энэхүү өвчин харьцангуй хор хөнөөл багатайд тооцогддог ч харвалт өдөөснөөр хүнд үр дагаварт хүргэж болохыг судалгааны баг онцолжээ.

Финландын Хельсинки хотын их сургуулийн эмнэлэг дэх мэдрэлийн төвийн харвалтын тасгийн эрхлэгч доктор Юкка Путаала хэлэхдээ “Залуучуудын харвалттай холбоотой уламжлалт бус эрсдэлүүд, ялангуяа мигрений нөлөө энэ судалгаагаар анхаарал татаж байна. Эрүүл мэндийн салбарынхан залуу өвчтөнүүдтэй ажиллахдаа эдгээр хүчин зүйлийг тогтмол тодруулж, эрт илрүүлэлтийн аргачлалаа шинэчлэх шаардлагатай” гэжээ.

Энэхүү судалгаа нь уламжлалт хүчин зүйлсээс гадна шинэ төрөлтийн эрсдэлд чиглэсэн оношилгоо, сэргийлэлт, удирдлагын стратегийг хөгжүүлэх шаардлагатайг бататган харуулснаар онцлог болжээ.