ХБНГУ-ын Засгийн газар хэдэн зуун сая ам.долларын үнэ бүхий биткойн худалдаж байгаа нь криптовалютын ханшид нөлөөлж эхэлжээ.

Тус улсын Холбооны эрүүгийн цагдаагийн алба 2024 оны нэгдүгээр сард Германы зүүн хэсгийн Саксон муж дахь хууль бус кино сайт ажиллуулж байсан этгээдүүдээс ойролцоогоор 2.2 тэрбум ам.долларын үнэ бүхий 50,000 орчим биткойн албадан хураан авсан талаар мэдэгдсэн юм. 

Харин өнгөрсөн сараас эхлэн Германы Засгийн газар албадан хураасан биткойныг худалдаж эхэлсэн бөгөөд зургадугаар сард 900 биткойн зарсан нь даваа гарагийн арилжааны ханшаар 52 сая ам.доллароор үнэлэгдэж байна хэмээн блокчэйн шинжилгээний “Arkham Intelligence” компани мэдэгдлээ.

Үүний дараа өнгөрсөн долоо хоногт тус улсын Засгийн газар ойролцоогоор 172 сая ам.долларын үнэ бүхий 3000 биткойн, даваа гарагт 2739 биткойн буюу 155 сая ам.долларын үнэ бүхий криптовалют нэмж худалджээ.

Эдгээр борлуулалтаас үүдэн биткойны ханш огцом буураад буй. Долдугаар сарын 5-ны арилжаагаар биткойны ханш 55,000 ам.доллароос буурч, 2024 оны хоёрдугаар сараас хойших хамгийн доод түвшинд хүрсэн гэж “CoinGecko” онцоллоо.

Энэхүү их хэмжээний криптовалютын борлуулалт нь криптовалютын хөрөнгө оруулагчдын санааг зовоож эхэлжээ.