Манай улсын ХАА-н салбараас экспортолдог гол түүхий эдүүдийн нэг нь мах, ноолуур, ноос, бодын хөөвөр, тэмээний ноос байдаг. ХАА-н биржийн вэбсайтад байршуулснаар  нэг кг боловсруулаагүй бараан ноолуур 120 мянган төгрөг, харин цайвар ноолуур 200 мянган төгрөг, боловсруулаагүй цагаан ноолуур нэг кг нь 250 мянган төгрөгийн экспортын ханштай байгаа гэж мэдээлжээ.

Үүнээс гадна,экспортод гаргаж байгаа малын махны үнийг  төрөл тус бүрээр нь ханшийг нь оруулжээ. Ханшийн мэдээллээс үзэхэд дулааны аргаар боловсруулсан үхрийн нэг кг мах зургаан ам.доллар байгаа нь 2023 оны ханшаар хамгийн өндөр үнэд тооцогдож байна. Энэ дүн нь дотоодын болон импортлогч улсын бараа, түүхий эдийн зах зээлийн ханш, валютын ханшийн хэлбэлзэл, биржийн арилжааны хаалтын ханш зэрэг үзүүлэлтээр тооцоолон гаргасан биржийн арилжааны ханш юм.

Манай  улс ГЕГ-ын 2023 онд гаргасан нэгдсэн тайлангаар нийтдээ 15.2 тэрбум ам.доллартай тэнцэх бараа,түүхий эдийг экспортод гаргаж, үүнээс 0.4 тэрбум ам.доллар нь ноолуур,0.3 тэрбум ам.доллар нь махны экспорт эзэлж байна. Манай улс ноолуурын экспортын  хувь хэмжээгээрээ олон улсад  БНХАУ-ын дараа орж байна.