“Barbie” брэндийн толгой компани “Mattel” даваа гарагт энэ жилийн санхүүгийн төлөвийг урьд танилцуулснаа цуцалж, АНУ-ын Ерөнхийлөгч Дональд Трампын худалдааны түншүүдэд ногдуулсан өндөр тарифын улмаас зардал өсөж байгаатай холбоотойгоор зарим бүтээгдэхүүнийхээ үнийг нэмэхээр болсноо мэдэгдлээ.

АНУ болон Хятадын хоорондын худалдааны зөрчил хурцдаж, хоёр тал харилцан 100 давсан хувийн тариф тогтоосон нь “Mattel” зэрэг тоглоомын компанийн үйлдвэрлэл, нийлүүлэлтэд сөргөөр нөлөөлжээ. Тус компанийн гүйцэтгэх захирал Инон Крейз “Тарифын бодлого тус салбарт томоохон хүндрэл үүсгэж байна" хэмээгээд, тоглоомын бүтээгдэхүүнд тариф ногдуулахгүй байхыг дэмжиж буйгаа илэрхийлсэн байна.

“Mattel”-ийн АНУ дахь нийт борлуулалтын 20 орчим хувийг Хятадаас импортолсон бараа бүрдүүлдэг бөгөөд “Barbie”, “Hot Wheels” зэрэг тоглоомыг Индонез, Малайз, Тайландаас мөн нийлүүлдэг аж. Эдгээр улс ч АНУ-ын зүгээс ногдуулсан тарифын нөлөөнд өртөөд байгаа юм.

Зардлаа бууруулахын тулд компани зар сурталчилгаа, хөнгөлөлт, урамшууллаа багасгахаар төлөвлөж, зардал хэмнэх зорилтоо өмнөх 60 сая ам.доллароос 80 сая болгож нэмэгдүүлжээ.

Нөхцөл байдал хүндхэн байгаа ч “Mattel” энэ оны нэгдүгээр улиралд 827 сая ам.долларын борлуулалт хийж, шинжээчдийн таамгаас давсан үзүүлэлттэй гарсан байна. Хувьцаанд ногдох алдагдал нь 3 цент байсан нь таамаглаж байснаас (10 цент) хамаагүй бага үзүүлэлт байв.

Мөн компани 2025 он хүртэл хэрэгжүүлэх 600 сая ам.долларын хувьцаа буцаан худалдан авах төлөвлөгөөгөө үргэлжлүүлж байгаа бөгөөд энэ оны эхний улиралд 160 сая ам.долларын хувьцаа эргүүлэн авсан байна.