Хямд өртгөөр хувцас үйлдвэрлэгч “Shein” компанийн АНУ-ын зах зээл дахь хурдацтай өсөлт тус улсын цахим аюулгүй байдлын мэргэжилтнүүдийг түгшээж эхэлжээ. Тэд “Shein”-ийг нийлүүлэлтийн сүлжээний технологийг Хятадтай холбоотой байдаг учраас тагнуулын үйл ажиллагааг хэрэгжүүлж болзошгүй хэмээн сэрэмжилж байгаа аж. “Shein”-ий тухайд логистикийн программ хангамжаа сонгогдсон үйлчлүүлэгчид дээр туршиж эхлээд буй.

Хэрэглээний программын интерфейс буюу API нь нийлүүлэлтийн сүлжээний үйл ажиллагаанд нэн чухал үүрэгтэй боловч жижиг компаниудын хувьд цахим аюулгүй байдлын эрсдэл дагуулдаг. Аюулгүй байдал нь алдагдсан API хэрэглэгчийн дата мэдээллийг  алдагдуулах магадлалтай байдаг аж.

“Shein” компани нь АНУ-ын томоохон компаниудыг оролцуулаад 50,000 гаруй аж ахуйн нэгжийг хамарсан нийлүүлэлтийн цогц сүлжээтэй талаар “Exiger” мэдээлсэн. Тэгвэл тус технологийг АНУ-ын нийлүүлэлтийн сүлжээнд ашиглахыг зөвшөөрөх нь кибер аюулгүй байдлын эрсдэлийг үүсгэж, дүрэм журмыг зөрчсөн үйлдэл болж болзошгүй юм.

“Shein” компани төв оффисоо Сингапур руу нүүлгэсэн ч Хятадад нийлүүлэлтийн сүлжээтэй хэвээр буй. Харин Хятад улсад компаниуд хуулийн дагуу Засгийн газартай мэдээллээ хуваалцах шаардлагатай байдаг нь санаа зовнил дагуулж байна. Тус компанийн зүгээс хэрэглэгчийн мэдээлэл хамгаалах олон улсын стандартыг дагаж мөрддөг тухайгаа мэдэгдсэн ч эргэлзээтэй хэвээр байгаа юм.

Аюулгүй байдалтай холбоотой асуудлыг шийдвэрлэхээр “Shein” компани Америк  хэрэглэгчдийн мэдээллийг дотоодын Microsoft Azure болон AWS зэрэг үүлэн үйлчилгээ үзүүлэгчдэд, Европын Холбооны хэрэглэгчдийн мэдээллийг Германд суурилсан серверүүдэд хадгалж эхэлжээ. Гэвч үйлдвэрлэлийн дата мэдээлэл нь Хятад улсад хадгалагдаж буй хэвээр байгаа бөгөөд тус улсын Засгийн газар тус мэдээлэлд хандах боломжтой аж. 

АНУ-ын эрх баригчдын зүгээс Хятадын компаниудтай холбоотой нийлүүлэлтийн сүлжээ болон мэдээллийн аюулгүй байдлын асуудалд сонор сэрэмжтэй хэвээр байхаа илэрхийлжээ.