Домогт хөрөнгө оруулагч Уоррен Баффетт “Berkshire Hathaway” компанийн хувьцаа эзэмшигчдийн ээлжит хурлын үеэр нэгэн түүхэн шийдвэрээ танилцуулж, энэ оны төгсгөлд гүйцэтгэх захирлын албан тушаалаасаа бууж, түүний удаах хүн болох Грег Абелд үүрэгт ажлаа шилжүүлэх санал гаргахаа мэдэгдлээ.

Баффетт 94 насандаа энэхүү шийдвэрээ нийтэд зарлахдаа өөрийн хошин мэдрэмжээр тайлбар хийж, “Үзэгчдийн алга ташилт олон утгатай байж болно. Гэхдээ би энэ удаад эерэгээр хүлээж авъя” хэмээн хошигножээ. Хүмүүсийн хайр хүндэтгэлийг ийн татсан тэрбээр зөвхөн компанийн өсөлт амжилтаар бус, ажил хэргийн ёс зүй, хүн төвтэй хандлагаараа бизнесийн ертөнцөд нэрээ мөнхөлсөн нэгэн юм.

Түүнийг 1965 онд “Berkshire Hathaway”-г удирдаж эхэлснээс хойш тус компанийн хувьцаа 5,502,284 хувиар өссөн бол энэ хугацаанд S&P 500 индекс 39,054 хувийн өсөлттэй байсан байна. Өөрөөр хэлбэл, Баффетт хувьцаа эзэмшигчдээ хосгүй хөрөнгөтэй болгож, хөрөнгө оруулалтын ур чадвар, хариуцлагатай удирдлагын үлгэр дууриал үзүүлжээ.

Түүний амжилтыг дуурайхыг хүссэн сая сая дагагчдад Баффетт олон жилийн турш хуримтлуулсан туршлага, сургаалиа хуваалцсаар ирсэн. Түүний хамгийн үнэ цэнтэй гурван зөвлөгөөг онцлон хүргэж байна.

Нэгдүгээрт, Баффетт ажил сонгохдоо цалинг бус хамтран ажиллагсад, удирдлагыг нь чухалчил гэж зөвлөдөг. Тэрбээр өөрөө анхны ажилдаа цалингийн хэмжээ ч мэдэлгүй орж байснаа дурссан байдаг. “Таныг хүрээлж буй хүмүүс таны зан чанарт нөлөөлдөг” гэж тэр хэлсэн нь ур чадвараас гадна орчны чухлыг харуулж буй хэрэг аж.

Хоёрдугаарт, Баффетт амьдралын замаа зөв олоход “өөрийн дуу хоолой”-г олж нээх нь чухал гэж үздэг. Залууст хандан тэрбээр “Анхны ажил тань яг тохирсон байх албагүй. Гэхдээ өөрийгөө таньсан үед хүнд ажил хийж байгаа мэт мэдрэмж огт төрдөггүй” хэмээн зөвлөжээ. Түүний хувьд хөрөнгө оруулалтад дурласан нь амьдралын замаа олсон үе байжээ.

Гуравдугаарт, Баффетт хязгаар тогтоож “үгүй” гэж хэлж сурахыг онцгойлон чухалчилдаг аж. “Амжилтад хүрсэн хүмүүс ба амжилтын оргилд хүрсэн хүмүүсийн ялгаа нь сүүлийнх нь бараг бүх зүйлд ‘үгүй’ гэж хэлдэгт оршдог” хэмээсэн нь түүний амьдралын хэмнэл, ачаалалгүй, төвлөрсөн байдлын тодорхойлолт болжээ.

Түүнийг сайн мэдэх хүмүүсийн хэлснээр Баффетт долоо хоногийн хуваариа бараг л сул байлгадаг бөгөөд зөвхөн чухал зүйлд л анхаарлаа хандуулдаг гэнэ. Энэ хандлага нь амжилтын хамгийн бат бөх суурь болохыг тэр олонтоо сануулж иржээ.

Баффеттын оронд томилогдохоор төлөвлөгдөж буй Грег Абел нь сүүлийн жилүүдэд компанийн үйл ажиллагаанд гүнзгий оролцож ирсэн бөгөөд оюуны өвийг нь үргэлжлүүлэн авч явах хүлээлт өндөр байна. Баффеттын арвин туршлага, үнэтэй сургааль нь бизнесийн дараагийн үеийн удирдагчдад чухал чиглүүлэгч хэвээр үлдэх нь дамжиггүй.