ОХУ-ын Төв банк 2022 оноос хойш анх удаа бодлогын хүүг бууруулав. Баасан гарагт гаргасан энэхүү шийдвэрээр хүүгийн түвшин 21 хувиас 20 хувь болж, зах зээлд урьдчилан таамаглаагүй зөөлөн дохио өгсөн байна. Эдийн засгийн шинжээчдийн үзэж байснаас хамаагүй багаар хүү буурсан нь инфляцын аажмаар саарсан хандлагатай уялдаж буйг тус банк тодотгожээ.

2025 оны дөрөвдүгээр сарын байдлаар улирлын нөлөөг хассан инфляц 6.2 хувь болж буурсан нь оны эхний гурван сарын 8.2 хувийн түвшнээс мэдэгдэхүйц доогуур үзүүлэлт болсон байна. Үүний сацуу Төв банк “инфляцын зорилтот 4 хувийн түвшинг хадгалах хүртэл мөнгөний бодлого хатуу хэвээр үлдэнэ” хэмээн мэдэгдсэн нь ирэх саруудын бодлогын чиглэл одоогоор тодорхой бус байгааг илтгэж байна.

Оросын эдийн засгийн өсөлт өнгөрсөн оны туршид идэвхтэй байсан ч 2025 оны нэгдүгээр улиралд огцом удаашрав. Хамгийн сүүлд 4.5 хувьтай байсан өсөлт 1.4 хувь болж буурсан нь үйлдвэрлэлд төвлөрсөн эдийн засгийн бүтцийн хязгаарлалтыг илтгэж байна. Төв банкны мэдээлснээр энэ удаагийн өсөлтийн гол хөдөлгөгч хүч нь батлан хамгаалах салбар байсан бөгөөд төрөөс оруулж буй их хэмжээний санхүүжилт энэхүү өсөлтийг дэмжжээ.

Сангийн сайд Максим Решетников төв банкнаас хүү буулгахыг дэмжиж, аж үйлдвэрийн салбар дахь хүлээлтээс доогуур гүйцэтгэлд онцгой анхаарал хандуулахыг уриалсан байна. Гэсэн ч зах зээлд эрэлт, нийлүүлэлтийн зөрүү хэвээр байгаагаас гадна, Орос-Украины дайны нөхцөл, капиталын урсгалын хязгаарлалт, валютын хатуу хяналт зэрэг нь эдийн засгийн хэврэг байдлыг хадгалж байна.

Гэсэн хэдий ч рублийн ханш гадаад зах зээлд хүчтэй хэвээр байна. Bank of America энэ оны эхний хагаст рублийг дэлхийн хамгийн сайн гүйцэтгэлтэй валют болсон гэж онцолсон нь ам.долларын ханшийн бууралт, экспортын дэмжлэг, дотоод зах зээлийн зохицуулалттай холбоотой юм.

Харин олон улсын эдийн засгийн зөвлөх байгууллага Capital Economics-ийн шинжээч Николас Фарр жилийн эцэст бодлогын хүүг 17 хувь хүртэл буурах боломжтой гэж үзсэн ч дайны нөхцөл, нийлүүлэлтийн хүндрэлтэй орчинд хүүг өндөр хэвээр хадгалах шаардлагатай гэдгийг анхааруулжээ.