50-иас доош насны эмэгтэйчүүдийн дунд хөхний хорт хавдрын өвчлөл нэмэгдсээр байна. 2012-2021 оны хооронд 50-иас доош насны эмэгтэйчүүдийн хөхний хорт хавдрын өвчлөл жил бүр 1.4 хувиар өссөн байгааг Америкийн Хавдрын Нийгэмлэг тогтоожээ.
Эмэгтэйчүүдийн эстроген дааврын өсөлт нь хөхний хорт хавдрын өвчлөлийг өдөөж байна хэмээн доктор Жон Лапук дурдлаа.
"Судлаачдын анзаарсан зүйл бол залуу охидын сарын тэмдэг эрт эхэлж, мөн эмэгтэйчүүдийн анхны төрөлт хойшилсоор байгаа нь эстрогений дааврын өсөлтийг өдөөж байж болзошгүй юм. Түүнчлэн тестостероныг эстроген болгон хувиргадаг ароматаза өөх хэмээн нэрлэгддэг фермент нь эстроген нэмэгдэх бас нэг шалтгаан юм” хэмээн тэрбээр нэмж дурдлаа.
Мөн 30-40 насны эмэгтэйчүүдэд согтууруулах ундааг хэтрүүлэн хэрэглэх тохиолдол их байдаг бөгөөд архи нь хөхний хорт хавдраар өвчлөх эрсдэлийг нэмэгдүүлдэг байна. Нийт хөхний хорт хавдрын 16 орчим хувь нь архинаас үүдэлтэй байдаг аж.
Хөхний хорт хавдраар өвчлөх эрсдэлийг бууруулах хамгийн үр дүнтэй амьдралын зуршлууд:
- Мэргэжилтнүүдийн үзэж байгаагаар дасгал хөдөлгөөн тогтмол хийх нь хөхний хорт хавдраар өвчлөх эрсдэлийг бууруулах хамгийн үр дүнтэй зуршлуудын нэг юм. Судалгаанаас үзэхэд биеийн тамирын дасгал хөдөлгөөн тогтмол хийдэг эмэгтэйчүүд идэвхгүй эмэгтэйчүүдтэй харьцуулахад хөхний хорт хавдраар өвчлөх эрсдэл 10-20 хувь бага байдаг байна.
- Тогтмол үзлэг, урьдчилан сэргийлэх эрт илрүүлэх шинжилгээнд хамрагдаж хэвших нь маш чухал юм.
- Тэнцвэртэй зөв хооллолт буюу төрөл бүрийн жимс жимсгэнэ, хүнсний ногоо, уураг, эрүүл өөх тос, үр тариа идэх нь хорт хавдраар өвчлөх эрсдэлийг бууруулахад тусалдаг байна. Эмэгтэйчүүд цэвэршилтийн дараа хөхний хорт хавдар тусах эрсдэл нэмэгддэг бөгөөд энэ үед зөв хооллож биеийн жинг зохистой түвшинд хадгалах нь чухал аж.
- Согтууруулах ундаа болон тамхины хэрэглээг хязгаарлах. Тамхи татах нь хөхний хорт хавдраар өвчлөх эрсдэлийг нэмэгдүүлэхээс гадна эрүүл мэндийн олон асуудлын шалтгаан болдог юм.
