Эмэгтэйчүүд хөдөлмөр эрхлэхэд хамгийн таатай улсаар Швед тодорлоо. “The Economist” Эдийн засгийн хамтын ажиллагаа, хөгжлийн байгууллагын гишүүн 29 улсын эмэгтэйчүүдийн хөдөлмөр эрхлэх нөхцөл байдлыг шинжилсэн ээлжит судалгааны дүнг танилцуулав.

Ингэхдээ дараах 10 үзүүлэлтээр улс орнуудыг эрэмбэлжээ.

Үүнд:
•  Дээд боловсрол
•  GMAT шалгалтад орсон эмэгтэйчүүдийн тоо
•  Ажиллах хүчний оролцооны хувь
•  Хүйсийн цалингийн зөрүү
•  Удирдах албан тушаал дахь эмэгтэйчүүдийн эзлэх хувь
•  Компанийн удирдах зөвлөлд ажиллаж буй эмэгтэйчүүдийн хувь
•  Засгийн газарт ажиллаж буй эмэгтэйчүүдийн хувь
•  Хүүхэд асрах цэвэр зардал
•  Эхийн цалинтай чөлөө
•  Эцгийн цалинтай чөлөө

Хоёр жил дараалан энэхүү жагсаалтыг Исланд тэргүүлсэн бол энэ онд Швед улс шилдэг улсаар тодров. 2024 онд Шведэд эмэгтэйчүүд эрэгтэйчүүдээс 7.3 хувиар бага цалинтай байсан нь OECD-ийн гишүүн орнуудын дундаж 11.4 хувиас бага үзүүлэлт юм. Удирдах албан тушаалд ажиллаж буй эмэгтэйчүүд 43.7 хувийг бүрдүүлж байгаа нь хамгийн өндөр үзүүлэлт байв. 

Швед улс 2006 оноос хойш жендерийн тэгш байдлын үзүүлэлтээр Дэлхийн эдийн засгийн форумаас гаргасан жагсаалтын топ 10-т багтсаар ирсэн юм. 2023 онд Шведэд эмэгтэйчүүдийн дундаж цалин эрэгтэйчүүдийн цалингийн 90 хувьтай тэнцэж байсан байна.

АНУ эхний 10-т багтаж чадалгүй 19 дүгээр байрт орсон бөгөөд энэ нь гайхах зүйл биш гэж The Economist-ийн мэдээллийн судлаач Лиззи Пит хэлжээ. Тэрбээр АНУ нь эдгээр үзүүлэлт бүрээр OECD-ийн дунджаас доогуур үнэлэгддэг болохыг онцолсон байна. 

Удирдах албан тушаал дахь эмэгтэйчүүдийн оролцоог хязгаарладаг нийгмийн барриер буюу шилэн таазны индексээр Скандинавын орнууд хамгийн өндөр үнэлгээ авсан байна. Үүнд Финланд, Дани, Норвеги, Швед, Исланд багтжээ. Эдгээр улс эмэгтэйчүүдийн боловсрол эзэмших, ажлын байранд оролцох, удирдах албан тушаалд хүрэх, эцэг, эхийн чөлөө авах, уян хатан ажлын цаг ашиглах боломжийг хамгийн ихээр дэмждэг гэж The Economist мэдэгджээ.