- Кофены хэрэглээ Хятадад огцом өсөж, уламжлалт цайны соёлыг халж эхэлжээ.
- Luckin, Cotti зэрэг үндэсний брэндүүд Starbucks-аас хэмжээгээр томорч өвөрмөц амттай ундаагаар өрсөлдөж байна.
- Кофены хэт хэрэглээ эрүүл мэндийн шүүмжлэлд өртөж хэрэглэгчдийн донтох байдал анхаарал татаж байна.
Өглөө бүр буцалсан цай уудаг байсан хятадын соёлд одоо ханборгоцойны американо, гахайн махтай латте хүч түрэн орж иржээ. Уламжлал хийгээд орчин үеийн соёлын огтлолцол дээр Хятадын кофе уух соёл шинэ шатанд гарч, хэрэглэгчдийн сонирхлыг татах ширүүн өрсөлдөөн эхэлсэн байна.
Сүүлийн хоёр жилийн хугацаанд “кофены дайн” гэгдэх энэ үзэгдэл илүү эрчимжиж, зах зээлд тэргүүлэхийг хүссэн үндэсний брэндүүд бүтээлч байдлаа туйлдаа хүргэжээ. Зах зээлийн гол тоглогч Luckin Coffee өнгөрсөн онд гэхэд 6,000 шинэ салбар нээж, 119 төрлийн шинэ бүтээгдэхүүн гаргасан бол өрсөлдөгч Cotti Coffee брэнд усан үзэм, өргөст хэмх бүр гахайн махтай латте зэрэг этгээд ундааг хэрэглэгчдэд санал болгож эхэлсэн нь олон нийтийн анхаарлыг татаж байна.
9.9 юань буюу ердөө 5,000 төгрөгийн үнэтэй кофе санал болгож Starbucks-ын үнийг гуравны нэг болтол буулгаснаар үнийн тэмцлийг өдөөсөн. Харин одоо амт ба найрлага дээр өрсөлдөөн шилжсэн нь илүү сонирхол татаж байна. Шинэ амт турших сонирхолтой хэрэглэгчид эдгээрийг энгийн кофе биш харин өдөр тутмын шинэ тренд мэт хүлээн авч буй юм. Алдарт Starbucks ч өрсөлдөөнөөс хоцролгүй Хятадад зориулсан 78 төрлийн шинэ ундаа гаргасан бөгөөд саяны Цагаан сарын үеэр тусгай меньюнд гахайн махтай латте танилцуулж байсан ч дахин санал болгосонгүй.
Гэвч энэхүү кофены өрсөлдөөний эрин үе хүнсний аюулгүй байдал, эрүүл мэндийн асуудлыг мөн давхар хөндөж байна. Жишээ нь, жүржтэй американо ундаа хүнс тэжээлийн хөндлөнгийн үнэлгээнд “C” зэрэглэл авсан нь олон нийтийн шүүмжлэл дагуулж “хэтэрхий илчлэгтэй” гэсэн шүүмжлэл дагуулжээ.
Зарим хэрэглэгч илүү эрүүл хувилбарт шилжиж байгаа бол зарим нь “шинэ амтны дон”-д автсан хэвээр байна. Маскарпоне бяслагтай латте, жасмин цэцгийн амттай кофе, пистачио кремтэй холимог кофе зэрэг уух зүйлс залуусын сэтгэлийг эзэмдээд байгаа нь илт гэж болохуйц юм.
Хятадын хотуудын гудамжнаа кофены үнэр сэнхийж өдөр бүр кофены тансаг шинэ бүтээл хэрэглэгчдийн TikTok хуудаст тавигдаж байна. Ийнхүү нэгэн үе зөвхөн барууны соёлд тооцогдож байсан кофе уух уламжлал Хятадад дахин төрж, амтны хувьсгал өрнөж байна. 
