АНУ-ын агаарын тээврийн "United Airlines" компани 2025 оны тавдугаар сарын 1-нээс Улаанбаатарын чиглэлд улирлын чанартай нислэг нээх болсноо мэдэгдлээ.

Тус компани 2025 оны зунаас олон улсын найман шинэ чиглэл нээхээр болсны нэг нь Монгол Улсын нийслэл болж байна. Boeing 737-800 агаарын хөлгөөр Токиогоос Улаанбаатарын чиглэлд долоо хоногт гурван удаа нислэг үйлдэх аж.

“United Airlines” компаниас шинээр нээж буй бусад чиглэлийг тодруулбал, АНУ-ын Нью-Йорк хотоос Испанийн Билбао, Португалийн Фаро, Португалийн Мадейра, Гринландын Нүүк, Италийн Палермо хотууд руу, мөн Японы нийслэл Токиогоос Тайванийн Каошюн, АНУ-ын Вашингтон хотоос Сенегалын Дакар хот руу үйлдэх юм байна.