Өнөөдөр Бээжинд эхэлсэн Бүх Хятадын Ардын Төлөөлөгчдийн Их Хурлын ээлжит чуулганы нээлтийн хүрээнд тус улс эдийн засгаа энэ онд 5 хувиар тэлэхийг зорьж буйгаа зарлалаа. Түүнчлэн томоохон төслүүдийг санхүүжүүлэх зорилгоор урт хугацаат, тусгай бонд олон улсын хөрөнгийн зах зээлд гаргахаар төлөвлөж байгаагаа Засгийн газрын ажлын төлөвлөгөөнд дурдсан байна.

Нийт 2800 гаруй төлөөлөгч оролцож буй Бүх Хятадын Ардын Төлөөлөгчдийн Их Хурлын ээлжит чуулганы үеэр тус улс ДНБ болон эдийн засгийн бусад үзүүлэлтийн зорилтуудыг тодорхойлсноо танилцуулсан ба “Хятад улс үйлдвэрлэлийн салбарт гадаадын хөрөнгө оруулалтад тавьсан хязгаарлалтаа цуцална” хэмээн Төрийн зөвлөлийн Ерөнхий сайд Ли Цян нээлтийн үгэндээ мэдэгдлээ.

Бээжин хот энэ онд үндэсний стратегид нийцсэн томоохон төслүүдийг санхүүжүүлэх зорилгоор нийт 1 их наяд юань буюу 138.9 тэрбум ам.долларын урт хугацаатай төрийн сангийн тусгай бондыг гаргахаар төлөвлөжээ. Харин 2024 онд орон нутгийн засаг захиргаанд зориулж 3.9 их наяд юанийн тусгай зориулалтын бонд гаргахаар төлөвлөсөн нь өнгөрсөн оноос 100 тэрбум юаниар өссөн үзүүлэлт юм.

Өнгөрсөн онд Хятадын эдийн засаг 5.2 хувиар өсөж, зорилтот түвшнээ давсан боловч үл хөдлөх хөрөнгийн салбар, мөн экспортын уналтаас үүдэн цар тахлын дараах сэргэлт таамаглаж байснаас удаашралтай байгааг шинжээчид тодотгож байна. 

2023 онд тус улсын ажилгүйдлийн түвшин дунджаар 5.2 хувьтай байсан бөгөөд энэ хугацаанд нийт 12.44 сая ажлын байр шинээр бий болсныг Үндэсний статистикийн товчооноос нь мэдээлээд байна. Тэгвэл энэ онд Хятад улс хот суурин газрын ажилгүйдлийн түвшнийг 5.5 хувиас ихгүй түвшинд хадгалж, 12 сая ажлын байр шинээр бий болгон, хэрэглээний үнийн индексийг 3 хувьд хадгалахыг зорьж байна. Товчхондоо, эдийн засгийн хувьд энэ онд БНХАУ 2023 онтой ижил түвшний зорилтыг зарлалаа.