Засгийн газраас УИХ-д өргөн мэдүүлсэн 2025 оны төсвийн төсөлд өсөн нэмэгдэх хүнсний хэрэгцээг хангах зорилгоор "Атрын IV" аяныг хэрэгжүүлж, "Хүнсний хангамж, аюулгүй байдал", "Цагаан алт", "Шинэ хоршоо - чинээлэг малчин" гэсэн үндэсний хэмжээний хөтөлбөрүүдийг  үргэлжлүүлнэ.Үргэлжүүлэхдээ дараах байдлаар санхүүгийн дэмжлэг үзүүлнэ гэжээ.Тухайлбал,

1. “Хүнсний хангамж,аюулгүй байдал” үндэсний хөдөлгөөний хүрээнд нийт 1.1 их наяд төгрөгийн олгоод байгаа бөгөөд 2025 онд 200 орчим тэрбум төгрөгийн шинэ зээл олгохоор байгаа тул ирэх оны зээлийн хүүгийн дэмжлэгт 97.9 тэрбум төгрөг төсөвлөжээ.

2. “Атрын 4” аяны хүрээнд 2025 онд 650 тэрбум төгрөгийн зээл олгохтой холбогдуулан ирэх оны зээлийн хүүгийн дэмжлэгт 58.7 тэрбум төгрөг гаргана.

3. “Цагаан алт”үндэсний хөдөлгөөний хүрээнд 2024 онд 300.0 тэрбум төгрөг, 2025 онд 788.0 тэрбум төгрөгийн зээлийг шинээр олгохоор байгаа тул ирэх оны зээлийн хүүгийн дэмжлэгт 77.1 тэрбум төгрөг тусгалаа.

4. “Шинэ хоршоо-Чинээлэг малчин” хөтөлбөрийн хүрээнд 2024 онд нэг их наяд төгрөг, 2025 онд 500.0 тэрбум төгрөгийн шинэ зээл олгоно. Иймд ирэх оны зээлийн хүүгийн дэмжлэгт 143.4 тэрбум төгрөг тусгажээ. Мөн шинээр олгох зээлд батлан даалт гаргахад Зээлийн батлан даалтын сангийн хөрөнгийг 50 тэрбум төгрөгөөр нэмэгдүүлэхээр 2025 оны төсвийн төсөлд оруулжээ.

5. Түүнчлэн, зудын хүндрэлтэй нөхцөл байдлын улмаас малчин өрхийг ядууралд өртөхөөс сэргийлэх зорилгоор арилжааны банкин дахь 1.3 их наяд төгрөгийн малчдын зээлийн үндсэн төлбөрийг нэг жилээр хойшлуулж, тус хугацаанд төлөх зээлийн хүүгийн 6 нэгж хувиас давсан хэсгийг төсвөөс төлсөн. Энэхүү арга хэмжээтэй холбогдуулан зээлийн хүүгийн зөрүүг 2024, 2025 онуудад хоёр хувааж төлж байгаа бөгөөд ирэх онд 77.3 тэрбум төгрөгийг тус тус төсөвд тусгасан байна.