- Хиймэл оюуны шинэ загварууд асуултад хариулахдаа шат дараалсан логик сэтгэлгээ ашиглаж, илүү оновчтой хариулт боловсруулах чадвартай болжээ. Энэ шинэчлэл нь “DeepSeek”-ийн R1, “OpenAI”-ийн GPT-4, “xAI”-ийн Grok 3 зэрэг загварт илэрч байгаа аж.
- “Nvidia”-ийн өсөлт цаашид удаан үргэлжлэх эсэхэд шинжээчид эргэлзээд буй ч Хуанг үүнийг үгүйсгэж, "Шинэ үеийн логик сэтгэлгээ хөгжсөн загварууд илүү хүчирхэг чип шаарддаг" хэмээн онцолсон байна.
- Мөн “Nvidia”-ийн шинэ GB200 чипийн Америкийн зах зээл дээрх хувилбар нь Хятадынхаас 60 дахин хурдан хиймэл оюунаар контент үүсгэх чадвартай гэдгийг онцлон дурджээ.

“Nvidia” компанийн гүйцэтгэх захирал Женсен Хуанг хиймэл оюуны шинэ загварууд өмнөх үеэсээ 100 дахин их тооцоолох хүчин чадал шаардах болсон талаар мэдэгдлээ. Учир нь эдгээр загвар асуултад хариулахдаа шат дараалсан логик сэтгэлгээ ашиглаж, илүү оновчтой хариулт боловсруулах чадвартай болжээ. Энэ шинэчлэл нь “DeepSeek”-ийн R1, “OpenAI”-ийн GPT-4, “xAI”-ийн Grok 3 зэрэг загварт илэрч байгаа аж.
“Nvidia” компанийн өнгөрсөн оны дөрөвдүгээр улирлын орлого 78 хувиар өсөж, 39.33 тэрбум ам.долларт хүрсэн. Гэсэн хэдий ч зарим шинжээч хиймэл оюуныг илүү хямд дэд бүтцээр хөгжүүлэх боломжтой гэж үзэн “Nvidia”-ийн өсөлт цаашид удаан үргэлжлэх эсэхэд эргэлзээд буй. Харин Хуанг үүнийг үгүйсгэж, "Шинэ үеийн логик сэтгэлгээ хөгжсөн загварууд илүү хүчирхэг чип шаарддаг" хэмээн онцолсон байна.
АНУ-ын экспортын хязгаарлалтаас шалтгаалан “Nvidia”-ийн Хятад дахь борлуулалт хоёр дахин буурсан бөгөөд тус улсад “Huawei” зэрэг компани өрсөлдөөнийг улам нэмэгдүүлж байна. Гэсэн ч Хуанг хөгжүүлэгчдийн программ хангамжийн шийдэлд итгэж буйгаа илэрхийлсэн юм.
Түүнчлэн тэрбээр “Nvidia”-ийн шинэ GB200 чипийн Америкийн зах зээл дээрх хувилбар нь Хятадынхаас 60 дахин хурдан хиймэл оюунаар контент үүсгэх чадвартай гэдгийг онцлон дурджээ.
“Nvidia” компани хиймэл оюуны салбарын гол тоглогч хэвээр бөгөөд сүүлийн таван улирал дараалан орлого нь хоёр дахин өссөн ч 2024 оны дунд үеэс өсөлтийн хурд нь бага зэрэг саараад буй.