Засгийн газар ашигт малтмалын нөөц ашигласны төлбөр тооцох аргачлалд өөрчлөлт оруулж, олборлогч аж ахуйн нэгжүүд бүтээгдэхүүнээ биржээр арилжаалах сонирхлыг нэмэгдүүлэх зохицуулалт хийлээ.

Шинэ журамд зааснаар, олборлогч компани нийт экспортын бүтээгдэхүүнийхээ дөрөвний нэгийг Уул уурхайн биржээр арилжсан тохиолдолд тухайн төрлийн нийт бүтээгдэхүүнд ногдох ашигт малтмалын нөөц ашигласны төлбөрийг биржийн үнээр тооцох боломжтой болно. Энэхүү зохицуулалтыг 2025 оны арванхоёрдугаар сарын 31-нийг хүртэл дагаж мөрдөнө.

Аж үйлдвэр, эрдэс баялгийн сайд Г.Дамдиннямын мэдээлснээр, өмнө нь ашигт малтмалын нөөц ашигласны төлбөрийг жишиг үнээр тооцдог байсан нь бодит үнээсээ хэт өндөр байжээ. Тухайлбал, баяжуулсан коксжих нүүрсийг 22.6 хувиар, хайлуур жоншийг 54.3 хувиар, төмрийн хүдрийг 26.6 хувиар илүү үнээр тооцон татвар авдаг байв. Түүхий эдийн үнэ өсөлттэй үед аж ахуйн нэгжүүд энэхүү дарамтыг даадаг байсан ч, үнэ унасан нөхцөлд алдагдалд орох эрсдэл нэмэгдсэн гэж тэр онцолсон юм.

Засгийн газрын энэхүү өөрчлөлтөөр уул уурхайн бүтээгдэхүүний үнэлгээг бодитой болгох, компаниудын ашгийг хамгаалахын зэрэгцээ биржийн арилжааг идэвхжүүлэх зорилго тавьж байна. Өнөөдрийн байдлаар нийт олборлож буй бүтээгдэхүүний 15.6 хувь нь биржээр арилжаалагдаж байгаа бол өмнөх жилүүдэд энэ үзүүлэлт 26.7 хувьтай байжээ.

Шинэ журам хэрэгжсэнээр уул уурхайн биржийн арилжааны идэвхи нэмэгдэж, улсад 100 тэрбум төгрөгийн нэмэлт орлого төвлөрөхөөр тооцоолж байна. Засгийн газар энэ өөрчлөлтийг уул уурхайн салбарын тогтвортой байдалд “түүхэн шийдвэр” болно гэж тодорхойллоо.