АНУ-ын Худалдааны яам хагас дамжуулагч болон түүнтэй холбоотой бүтээгдэхүүний импортод өргөн хүрээтэй шалгалт эхлүүлснээ зарлалаа. Энэ нь үндэсний аюулгүй байдалд заналхийлж болзошгүй импортын барааг тогтоох зорилготой гэж тодорхойлсон бөгөөд улмаар шинэ тарифын давлагаа үүсгэх үндэс суурь болох хүлээлттэй байна.

Шалгалтын хүрээнд хагас дамжуулагч хавтан, чип үйлдвэрлэлийн тоног төхөөрөмж, мөн эцсийн хэрэглээнд зориулсан хагас дамжуулагч агуулсан бүтээгдэхүүнүүд багтаж байгаа юм. Энэ алхам нь Ерөнхийлөгч Дональд Трампын “тэнцвэртэй тариф” нэртэй худалдааны шинэ бодлогын хүрээнд хийгдэж буй дараагийн алхам боллоо.

Худалдааны яам энэхүү ажиллагааг 1962 оны Худалдааг өргөжүүлэх тухай хуулийн 232 дугаар зүйлд үндэслэн эхлүүлсэн нь анхаарал татаж байна. Энэ хуулийн дагуу үндэсний аюулгүй байдалд сөргөөр нөлөөлж болзошгүй импортыг Ерөнхийлөгчийн эрх мэдлийн хүрээнд тарифын зохицуулалтаар хязгаарлах боломжтой байдаг ажээ.

Хэдий зарим чип болон электрон бараа өнөөг хүртэл түр хугацаанд хөнгөлөлт эдэлж байгаа ч энэ нь шилжилтийн үеийн зохицуулалт төдий бөгөөд цаашид бүхэлд нь шинэ тарифт хамруулахаар бэлтгэж буйг Трампын засаг захиргаа онцолж байна. Худалдааны сайд Ховард Лутникийн мэдэгдсэнээр “тусгай тарифын журам” ирэх нэгээс хоёр сарын дотор хэрэгжиж эхлэх төлөвлөгөөтэй байгаа аж.

Нөгөө талаас АНУ чипийн үйлдвэрлэлээ гадаад зах зээлээс хараат бус байлгахыг эрмэлзэж, дотоодын үйлдвэрлэлийн суурийг бэхжүүлэх алхмуудыг эрчимжүүлж байна. “Хагас дамжуулагч болон Шинжлэх ухааны тухай хууль”-ийн хүрээнд 280 тэрбум ам.долларын бодлогын дэмжлэгийг баталж үндэсний чип үйлдвэрлэлд хөрөнгө оруулалт татаж эхэлжээ.

Nvidia компани АНУ-д бүрэн үйлдвэрлэгдэж эхлэх хиймэл оюуны суперкомпьютерийн анхны үйлдвэрээ барихаа зарласан бол Тайванийн TSMC компанийн зүгээс мөн тус улсад хийж буй хөрөнгө оруулалтаа 100 тэрбум ам.доллараар нэмэгдүүлэхээ илэрхийлээд байна. Энэ бүхэн АНУ-ын зүгээс хагас дамжуулагчийг зөвхөн эдийн засгийн бус үндэсний аюулгүй байдлын асуудал болгон авч үзэж буйг харуулж байна.

Олон нийтийн саналыг Худалдааны яам ирэх 21 хоногийн дотор хүлээн авах бөгөөд энэхүү хэлэлцүүлгийн дараа шинэ тарифын шийдвэр бодитоор хэрэгжиж эхлэх боломжтой болох юм. Энэ удаагийн алхам нь зөвхөн технологийн салбар төдийгүй олон улсын худалдааны орчинд ноцтой өөрчлөлт авчрах төлөвтэй байна.