Nintendo компани 2026 оны гуравдугаар сард дуусах санхүүгийн жилд шинэ Switch 2 тоглоомын консолоос 15 сая ширхэг борлуулахаар төлөвлөж байгаагаа мэдэгдлээ.

Түүнчлэн тус мэдэгдлийн үеэр Nintendo компани 2024 оны санхүүгийн тайлангаа танилцууллаа. Тус компанийн өнгөрсөн оны орлого 1.45 тэрбум ам.долларт хүрсэн нь өмнөх оны мөн үетэй харьцуулахад 24.7 хувиар буурсан үзүүлэлт юм. Харин цэвэр ашиг 50 хувиар буурсан нь хэрэглэгчид тоглоомын шинэ консолыг хүлээж, өмнөх загварыг худалдаж авахаас зайлсхийж байгаатай холбоотой хэмээн тус компанийн зүгээс мэдэгдэв.

Nintendo өмнө нь хуучин Switch консолын 2024 оны борлуулалтыг 11 сая ширхэг гэж таамаглаж байсан ч 10.8 сая ширхгийг борлуулж чадсан юм. 

Switch 2-ын үнэ АНУ-д 449.99 ам.доллароос эхлэх ба өмнөх загваруудаас сайжруулсан техникийн үзүүлэлтүүдтэй аж. Анхны Switch 2017 онд гарсан бөгөөд Nintendo-гийн түүхэн дэх хоёр дахь хамгийн олон борлуулагдсан консол болсон.