Засгийн газар өнгөрсөн хугацаанд автобензин, дизель түлшний үнийн огцом хэлбэлзлээс урьдчилан сэргийлэх, нийлүүлэлтийг тогтвортой байлгахын тулд шат дараатай олон арга хэмжээ авч хэрэгжүүлж ирсэн. Газрын тосны бүтээгдэхүүний үнийн өсөлтөөс сэргийлэх,нийлүүлэлтийн тогтвортой байдлыг хангах ажлын хүрээнд 2025 оны төсвийн төсөлд зарим төрлийн газрын тосны бүтээгдэхүүний гаалийн болон онцгой албан татварыг 2025 оны нэгдүгээр сарын нэгний өдрийг хүртэл "0" хувь байхаар тогтоод байгаа билээ. Цаашид үнийн өсөлтөөс сэргийлэх, газрын тосны бүтээгдэхүүний нийлүүлэлт, хангамжийн тогтвортой байдлыг хангах зорилгоор энэхүү арга хэмжээг 2025 онд үргэлжлүүлэхээр Засгийн газраас УИХ-д хэлэлцүүлэхээр өргөн мэдүүлсэн тогтоолын төсөлд тусгаж өгчээ. Ингэснээр бараа, бүтээгдэхүүний үнийн өсөлтөөс сэргийлэх, уул уурхай, хөдөө аж ахуйн үйлдвэрлэл, бүтээн байгуулалт зэрэгт шаардлагатай газрын тосны бүтээгдэхүүний хангамжийг тогтвортой байлгахад чухал ач холбогдолтой гэж үзжээ.Манай улс ОХУ-аас газрын тосны бүтээгдэхүүнийхээ 95 хувийг импортоор авдаг. ОХУ-ын Ерөнхийлөгч В.В.Путин манай улсад албан ёсны айлчлал хийх үеэр манай улсад нийлүүлэх газрын тосны нийлүүлэлтийг хэвээр хадгална гэдгээ мэдэгдсэн.

Монгол Улсын засгийн газрын тэргүүн Л.Оюун-Эрдэнэ Дорноговь аймагт шинээр баригдаж байгаа газрын тос боловсруулах үйлдвэрийн ажилтай танилцах үеэр энэ бүтээн байгуулалтын ажлыг яаравчлуулан 2027 онд ашиглалтад оруулах чиглэл өгч, санхүүжилтийг саадгүй гаргахад анхаарч ажиллахаа мэдэгдсэн. Энэ үйлдвэр ашиглалтад орсноор жилд 1.5 сая тонн газрын тос боловсруулах хүчин чадалтай болох юм.