Биткойны ханш 80,500 ам.долларт хүрч, сүүлийн гурван сарын доод түвшинд хүрлээ. АНУ-ын Ерөнхийлөгч Дональд Трампын сонгуулийн дараах криптовалютын өсөлт эрчээ алдаж, биткойны ханш өнгөрсөн оны арванхоёрдугаар сард тогтоосон дээд түвшнээс 25 хувиар буурчээ.

Трамп кампанит ажлынхаа үеэр криптовалютын зах зээлийг дэмжинэ хэмээн амласан бөгөөд сонгуулийн ялалтын дараагаар биткойны ханш огцом өссөн юм. Харин дэлхийн хөрөнгийн зах зээлийн сулрал, шинэ Ерөнхийлөгчийн тарифын бодлоготой холбоотой тодорхойгүй байдал, мөн Орос-Украины мөргөлдөөний нөхцөл байдал зэрэг нь биткойны ханшийн уналтад нөлөөлөөд буй.

Түүнчлэн хөрөнгө оруулагчдын хувьд бас нэгэн томоохон цохилт нь криптовалютын тэргүүлэгч биржүүдийн нэг болох Bybit хакерын халдлагад өртөж, 1.5 тэрбум ам.долларын криптовалют алдсан явдал байлаа. Үүнийг крипто салбарын түүхэн дэх хамгийн том хулгай хэмээн үзэж байна.