“Apple” компани “Google”-ийн хиймэл оюун ухааны “Gemini” технологийг iPhone гар утасны шинэ загваруудад ашиглах талаар хэлэлцээ хийж байгаагаа даваа гарагт мэдэгдлээ. Уг мэдээлэл гарснаар Alphabet компанийн хувьцааны ханш хөрөнгийн зах зээлд 4 хувиар өсөөд байна.

“Apple” компанийн зүгээс удахгүй худалдаанд гарах iPhone гар утасны функцэд хиймэл оюун ухааны хэрэгслийг нэгтгэн хөгжүүлэх сонирхолтой байгаа бөгөөд энэ чиглэлээр “Google” компанитай хамтрах хэлэлцээ үргэлжилж байгаа аж.

iPhone-ийн дараагийн том шинэчлэлт болох iOS 18 үйлдлийн систем нь ирэх зургадугаар сард Worldwide Developers чуулганы үеэр танилцуулагдах хүлээлттэй байгаа юм. Харин хиймэл оюун ухааны нэгтгэл нь уг чуулганы үеэр зарлагдах эсэх нь хараахан тодорхойгүй байна.

Өнгөрсөн сард болсон “Apple” компанийн хувьцаа эзэмшигчдийн жилийн хурлын үеэр гүйцэтгэх захирал Тим Кук хиймэл оюун ухаанд "их хэмжээний хөрөнгө оруулалт хийж байгаа талаар онцолж байсан юм.

Хэдийгээр "Apple" нь OpenAI компанитай хамтрах талаар хэлэлцээ хийж байсан ч гэрээний нөхцөл, хэрэгжилтийн талаар нарийвчилсан мэдээлэл тодорхойгүй хэвээр байна.