Монголбанкны тайланд дурдсанаар Монгол Улсын хөдөлмөрийн зах зээл 2024 оны дөрөвдүгээр улиралд идэвхтэй үргэлжилж, улирлын туршид томоохон өөрчлөлтгүй байсан ч өнгөрсөн оны мөн үетэй харьцуулахад бодит ахиц гарсан эерэг үзүүлэлтүүдтэй байна. Жилийн хугацаанд ажиллах хүчний тоо 53.2 мянган хүнээр нэмэгдэж, ажиллах хүчнээс гадуурх хүн ам 27.7 мянгаар буурсан нь зах зээлийн эрэлт, идэвхжил өндөр хэвээр буйг нотолж байна.

Тайлант улиралд ажилгүйдлийн түвшин 5.3 хувьтай бүртгэгдсэн нь өмнөх оны мөн үеийн 3.9 хувиас өссөн хэдий ч олон жилийн дунджаас 2.6 нэгж хувиар доогуур үзүүлэлт болж байна. Энэ нь хөдөлмөрийн захад эрэлт өндөр хэвээр байгааг илтгэж байна.

Ажиллах хүчнээс гадуурх хүн ам 869.2 мянгад хүрч буурсан бөгөөд үүнд суралцагч, тэтгэврийн насныхан, эрүүл мэндийн шалтгаантай иргэдээс бусад бүлгийн хүн амын тоо багассан нь голлон нөлөөлжээ. Ийнхүү хөдөлмөрийн захын оролцоо нэмэгдэж эдийн засгийн идэвхжлийг дэмжиж байна.

Хөдөлмөрийн захад ажиллах хүчний оролцооны түвшин 2024 оны дөрөвдүгээр улиралд 62.2 хувьтай гарсан нь өнгөрсөн оны мөн үетэй харьцуулахад 2.7 нэгж хувиар нэмэгдсэн үзүүлэлт юм. Хэдийгээр өмнөх улирлын цар тахлын дараах хамгийн өндөр түвшин болох 63 хувьд хүрч байсан үзүүлэлтээс үл ялиг буурсан ч нийт хандлага өсөлттэй хэвээр үргэлжилж байна.

Нийт ажиллагсдын тоо жилийн дүнгээр 2.4 хувиар буюу 31.2 мянган хүнээр нэмэгдэж 1 сая 353 мянгад хүрсэн байна. Барилга, худалдаа болон бусад үйлчилгээний салбарын ажиллагсдын тоо нэмэгдсэн нь нийт өсөлтөд голлон нөлөөлсөн бол харин хөдөө аж ахуй, уул уурхай, боловсруулах үйлдвэрлэлийн салбарт ажиллах хүч буурчээ.

Эдгээр үзүүлэлтүүд нь хөдөлмөрийн зах зээлд тогтвортой эерэг өөрчлөлт үргэлжилж буйг харуулж байна.