Монгол Улсын Тэргүүн Шадар сайд, Эдийн засаг, хөгжлийн сайд Л.Гантөмөр өнөөдрийн Засгийн газрын хуралдаанд 14 томоохон мега төслийн хэрэгжилтийн явцыг танилцууллаа. Тэрбээр Засгийн газрын үйл ажиллагааны хөтөлбөрт тусгасан эдгээр төслийн тав нь ажил хэрэг болж, бодит үр дүнгээ үзүүлж эхэлснийг онцлов.

Тодруулбал, Эрдэнэбүрэнгийн усан цахилгаан станцын санхүүжилтийн гэрээ байгуулж, Гашуунсухайт-Ганцмод хил дамнасан төмөр замын бүтээн байгуулалт эрчимжиж, Монгол газрын тос боловсруулах үйлдвэрийн нэмэлт санхүүжилт батлагдан, Монгол-Францын хамтарсан ураны төслийн хөрөнгө оруулалтын гэрээ хүчин төгөлдөр болж, нүүрс-хими, кокс-химийн чиглэлийн Хөх нүүрсний үйлдвэрийн ажил эхлээд байна.

Төсөл тус бүрийг эдийн засаг, нийгэмд үзүүлэх үр нөлөөгөөр нь ангилбал дөрвөн чиглэлд хуваагдаж буй. Үүнд: экспортын чадавхыг нэмэгдүүлэх, дотоодын үйлдвэрлэлийг дэмжих, эрчим хүчний нийлүүлэлтийг нэмэгдүүлэх, нийгмийн дэд бүтцийг сайжруулах чиглэлүүд багтжээ. Экспортын чадавхыг нэмэгдүүлэх төслүүдийн үр дүнд экспортын орлого хоёр дахин нэмэгдэж, тээврийн зардал 50 хувиар буурна гэж тооцоолж байна. Мөн Европ, Азийг холбох шинэ гарц бий болох аж.

Дотоодын үйлдвэрлэлийг дэмжих төслүүд хэрэгжсэнээр ган болон стратегийн түүхий эдийн үндэсний үйлдвэрлэл хөгжиж, Монгол Улс нефть-химийн салбарт хөл тавих боломж бүрдэнэ. Үүнтэй зэрэгцэн дотоодын шатахууны хэрэглээний 50–60 хувийг хангах чадалтай болно. Харин эрчим хүчний салбарт хэрэгжиж буй төслүүд нь уул уурхайн бүсүүдийн цахилгааны найдвартай байдлыг хангахаас гадна төвийн бүсийн эрчим хүчний системд горимын тохируулга хийх эх үүсвэр бий болгоно. Энэ нь жил бүр 45–50 сая ам.долларын импортын зардлыг бууруулж, цэвэр, хямд эрчим хүчийг дотоодын хэрэглэгчдэд хүргэх нөхцөл бүрдүүлэхээр байна.

Одоогоор хэрэгжиж эхэлсэн төслүүдэд Гашуунсухайт-Ганцмодны төмөр зам, ачаа тээврийн терминал, Газрын тос боловсруулах үйлдвэр, Ураны олборлолт, Эрдэнэбүрэнгийн УЦС болон нүүрс-хими чиглэлийн үйлдвэр багтаж байна. Тэдгээр нь зөвхөн эдийн засгийн үр өгөөж төдийгүй, Монгол Улсын хөгжлийн шинэ шатанд гаргах стратегийн суурь болно гэж Засгийн газар үзэж байна.