2025 оны тавдугаар сарын нэгнээс иргэний нисэхийн салбарт нэгэн шинэ хуудас нээгдэнэ. АНУ-ын 100 жилийн түүхтэй агаарын тээврийн "United Airlines" компани Монгол руу нислэг үйлдэж эхлэх юм.

"United Airlines"-ийн 2025 оны зуны нислэгийн хуваарьт олон улсын шинэ чиглэлүүд багтсан бөгөөд АНУ-ын агаарын тээврийн бусад компаниуд үйлчилдэггүй ховор хотууд руу нислэг хийхээр төлөвлөсөн тухай бид өмнө мэдээлж байсан.

Тэгвэл "United Airlines" Улаанбаатар хот руу тавдугаар сараас эхлэх нислэгтээ захиалгаа авч эхэлжээ. Тийзийн үнэ $1030-оос эхэлж байна. Энэ нислэг нь одоогоор улирлын чанартай бөгөөд тавдугаар сараас аравдугаар сар буюу бидний ярьдгаар жуулчны улиралд зориулагдсан. 

"United Airlines" компани Токио хотоос Улаанбаатар хот руу шууд нислэг үйлдэх бөгөөд энэ нь тус компанийн Азийн бүс нутагт нээгдэж буй шинэ чиглэлүүдийн нэг юм. 

Шинэ чиглэлүүдийн тойм: 

Токио Нарита - Улаанбаатар: 2025 оны 5-р сарын 1-нд эхлэх улирлын нислэг.

Токио Нарита - Каошиун, Тайвань: 2025 оны 7-р сарын 11-нд эхлэх.

Токио Нарита - Корор, Палау: Одоогоор Гуамаас болон Манилагаас нислэг үйлддэг Корор чиглэлд нэмэлт нислэг хийхээр төлөвлөсөн.