Өмнөх үеийнхнээс ялгаатай нь өнөөгийн 20-30 насны залуус, тэр дундаа “Gen Z” буюу Z үеийнхэн амьдралын энэ үе шатыг илүү эрт, илүү их дарамттайгаар туулж байна. Хүмүүсийн хувьд хамгийн хөгжилтэй, эрх чөлөөтэй, дурсамж дүүрэн байх ёстой хэмээн төсөөлдөг залуу нас нь олон хүний хувьд эсрэгээрээ стресс, ганцаардал, эргэлзээ, сэтгэл гутралтай нүүр тулсан хүндхэн үе болон хувирчээ. Тэд энэ байдалдаа “quarter-life crisis” буюу 20-иод насны хямрал хэмээх нэр өгөөд байна.

Хямрал үүсэхэд олон хүчин зүйл нөлөөлж байгаа ч хамгийн том шалтгаануудын нэг нь ганцаардал. 30-аас доош насны америкчуудын ердөө 17 хувь нь гүн гүнзгий, дотно харилцаа холбоо бусадтай тогтоосон гэж мэдүүлжээ. Үүн дээр нэмээд олон нийтийн сүлжээний нөлөө, хөдөлмөрийн тогтворгүй зах зээл, санхүүгийн дарамт, уур амьсгалын өөрчлөлт, геополитикийн хурцадмал байдал зэрэг олон хүчин зүйл залуусын ирээдүйг бүрхэг, амьдралыг улам бүр хүнд хэцүү болгож байна.

“CNBC Make It” 25–29 насны хэд хэдэн Gen Z залууст энэ үеийнхээ талаар асуухад тэд ийн хуваалцжээ:

“Амьдралын заавар хаана байна?” “Өмнөх шигээ өр төлбөргүй амьдрахсан.” “Ажил олдохгүй байна. Карьер бүрхэг, хайр дурлал бүтэхгүй, ер нь л бүх зүйл төлөвлөснөөс маань эсрэгээрээ эргэж байна.” “29 хүрчихээд одоо хүртэл хөлөө олоогүй яваадаа шаналж байна.” “Сүүлийн гурван сард 100 гаруй ажилд анкет өгсөн ч нэг ч хариу алга.” хэмээжээ.

Сэтгэл зүйчдийн хэлж буйгаар энэ үеийнхний ихэнх нь амьдралын утга учраа олох дарамтад орж, ирээдүйн шийдвэрүүд дээрээ эргэлздэг. Карьер, орон сууц, амьдралын хамтрагч гээд томоохон шийдвэрүүдийн дунд гацах нь элбэг. Үүний хажуугаар өөрийгөө таньж, амьдралын шинэ үе шат руу шилжиж, дасан зохицох үеийн сэтгэл зүйн бэрхшээл ч дагалддаг байна.

Тэгвэл сэтгэл зүйчдийн зөвлөж буйгаар өөрийгөө бусадтай, ялангуяа сошиал ертөнц дэх хүмүүсийн “өнгөлөг, гял цал” амьдралтай харьцуулахгүй байх нь маш чухал хэмээв. Олон нийтийн сүлжээнд бид бусдын амьдралын хамгийн сайхан хэсгүүдийг л хардаг. Харин амьдралын жинхэнэ нөхцөл байдал, туулж буй зам хөшигний ард л үлддэг. Иймд хүн бүр өөрийн хэмнэлээр амьдралын замаа туулж, урагшилдаг гэдгийг ойлгох хэрэгтэй.

Мөн өдөр тутмын амьдралдаа тогтмол дадлыг хэвшүүлэх нь чухал аж. Жишээлбэл, тогтмол дасгал хийх, найзтайгаа долоо хоног бүр ярилцах зэрэг энгийн зуршил ч амьдралд тогтвортой байдал илүү бий болгодог байна. Энэ бүхэн заавал тансаг, үнэтэй байх албагүй. Түүнчлэн хэрвээ боломжтой бол мэргэжлийн сэтгэл зүйчтэй уулзаж, дотоод хямралаа илүү гүн ойлгож, сэтгэлзүйн ур чадвараа хөгжүүлэх нь энэ үеийг даван туулахад хамгийн үр дүнтэй алхам хэмээн мэргэжилтнүүд зөвлөж байна.