ОПЕК-ийн гишүүн газрын тос үйлдвэрлэгчид өдөрт олборлох газрын тосны нийлүүлэлтийг наймдугаар сараас эхлэн 548,000 баррелиар нэмэгдүүлэхээр шийдвэрлэжээ. Энэ нь өмнө нь төлөвлөж байсан 411,000 баррельтэй харьцуулахад илүү өндөр дүн юм. 

Хуралд ОХУ, Саудын Араб, Алжир, Ирак, Казахстан, Кувейт, Оман болон Арабын Нэгдсэн Эмират зэрэг томоохон үйлдвэрлэгч улс оролцсон бөгөөд уулзалт цахимаар болсон байна.  

Энэхүү шийдвэрийг дэлхийн эдийн засгийн тогтвортой төлөв, газрын тосны эрэлт зэрэгтэй уялдуулан гаргасан байна. 

ОПЕК-ийн гишүүн орнууд анх сар бүр олборлолтоо 137,000 баррелиар нэмэгдүүлж, энэ хуваарийг 2026 оны есдүгээр сар хүртэл хадгалахаар төлөвлөж байсан. Гэвч энэхүү хуваарийг зөвхөн дөрөвдүгээр сард баримталж, тавдугаар сараас эхлэн нэмэгдлийн хэмжээг гурав дахин өсгөж 411,000 баррель болгон өөрчилсөн юм. Тэгвэл наймдугаар сард энэхүү өсөлтийг дахин нэмэгдүүлэхээр боллоо. 

Сүүлийн долоо хоногуудад газрын тосны үнэ Ойрхи Дорнодын мөргөлдөөний улмаас түр хугацаанд өссөн. 

Баасан гарагийн арилжаагаар Brent төрлийн газрын тосны ханш нэг баррель нь 68.30 ам.долларт, харин АНУ-ын West Texas Intermediate төрлийн газрын тосны ханш 66.50 ам.долларт хүрчээ.