Хятадын Сангийн яам ням гарагт мэдэгдэл гаргаж, Европын Холбооноос нийлүүлдэг 45 сая юань (ойролцоогоор 6.3 сая ам.доллар)-аас дээш үнийн дүнтэй эмнэлгийн тоног төхөөрөмжийг төрийн худалдан авалтаас хасахаар болсноо мэдэгдлээ. Энэхүү шийдвэр нь Европын Комиссоос өнгөрсөн сард зарласан хязгаарлалтад хариу болгосон үйлдэл юм. 

Сүүлийн саруудад Бээжин болон Брюсселийн хоорондын худалдааны зөрчил хурцдаж буй. Европын Холбоо БНХАУ-д үйлдвэрлэсэн цахилгаан автомашинд нэмэлт тариф ногдуулсан бол Хятад улс Европын Холбооноос оруулж ирдэг коньякт өндөр татвар тогтоосон билээ. 

Европын Холбоо өнгөрсөн сард жилд 60 тэрбум еврогоос давсан дүнтэй эмнэлгийн тоног төхөөрөмжийн төрийн худалдан авалтад БНХАУ-ын компаниудыг оролцуулахгүй гэдгээ мэдэгдсэн. Энэ нь 2022 онд хүчин төгөлдөр болсон “Олон улсын худалдан авалтын механизм” (International Procurement Instrument)-ын хүрээнд хэрэгжүүлж буй анхны арга хэмжээ юм. Тус механизм нь гадаадын компаниудад зах зээлийн харилцан нээлттэй байдлыг хангах зорилготой аж.

Хятадын Худалдааны яам өмнө нь “шаардлагатай хариу арга хэмжээ” авахаа анхааруулж байсан ба ийнхүү хязгаарлалт тогтоолоо. 

Шинэ хязгаарлалтаар зөвхөн Европын Холбооноос шууд нийлүүлж буй тоног төхөөрөмж багтаж байгаагаас гадна, нийт үнийн дүнгийн 50-аас дээш хувийг Европын Холбоонд үйлдвэрлэсэн эд анги бүрдүүлж буй бусад улсын бүтээгдэхүүнүүд ч хамаарах юм.

Европын Холбоо болон Хятад улс энэ сард дээд хэмжээний уулзалт хийхээр төлөвлөж байна.