Температурын өсөлтөөс шалтгаалж кимчинд хэрэглэгддэг напа байцааны чанар, тоо хэмжээ багасаж байгааг анхааруулжээ.

Напа байцаа нь сэрүүн уур амьсгалтай газар ургадаг бөгөөд хамгийн оновчтой температур нь 18-21 градус байдаг юм байна. Гэвч Өмнөд Солонгос дахь хэт халалтын улмаас напа байцаа тариалахад хүндрэл учирч эхэлсэн байна.  Уур амьсгалын өөрчлөлтөөс болж Өмнөд Солонгос хэзээ нэгэн цагт напа байцаа тариалах боломжгүй болж магадгүй гэсэн судалгаа байдаг. Энэхүү судалгаанд напа байцааны тариалангийн талбай ойрын 25 жилд эрс багасаж, 2090 он гэхэд өндөрлөг газарт байцаа ургахгүй болно гэж тооцож байгаа аж.

Эрдэмтэд халуун газар ургах боломжтой, хур тунадас, халдварын өөрчлөлтөд илүү тэсвэртэй таримал сортуудыг гаргахаар хичээж байна. Гэвч мэргэжилтнүүд эдгээр сортуудыг ургуулах нь илүү үнэтэй байхаас гадна амтгүй байх болно хэмээн эмээж байна.